Esentaı ózeni arqyly ótetin kópirdi rekonstrýksıalaǵan soń Ál-Farabı dańǵylynyń boıyna 600-den astam aǵash otyrǵyzylady, dep habarlaıdy Almaty-akshamy.kz.
Jasyl jelekterdi ınventarızasıalaý jáne orman-patologıalyq zertteý materıaldaryna sáıkes, kópirdi rekonstrýksıalaý aýmaǵynda barlyǵy 101 aǵash kesilgen, bul aǵashtar halyqtyń az qozǵalatyn toptary úshin velosıped joldarynyń, trotýarlar men pandýstardyń konstrýksıasyna túzetýler engizý úshin alynady, al 28 aǵashty saqtap, 10 aǵashty transplantasıalaýǵa bolady (onyń 3-i transplantasıalanǵan). Kesý aımaǵyndaǵy qalǵan aǵashtar boıynsha Almaty qalasy ekologıa jáne qorshaǵan orta basqarmasynyń qyzmetkerlerimen, jaqyn mańdaǵy turǵyn úılerdiń turǵyndarymen, ósimdikterdi qorǵaý jáne karantın ınstıtýtynyń ekologtarymen, sondaı-aq belsendilermen birlesip zertteý júrgizildi. Olardyń ishinde Saltanat Táshimova, Omar Nurhaıdarov jáne t.b. sarapshylardyń pikirinshe, jetilý jasyna jetken aǵashtardy qaıta otyrǵyzý orynsyz.
Óz kezeginde, kóshetterdi ýaqytsha qaıta otyrǵyzý kúzgi kezeńde beıimdelý úshin pıtomnık aýmaǵynda júzege asyrylady. Jyl sońyna deıin kesilgen aǵashtardyń ornyna kóshetterdi on ese mólsherde ótemdik otyrǵyzý júrgiziledi.
Ekologıa jáne qorshaǵan orta basqarmasynyń monıtorıń jáne jasyl qordy basqarý bóliminiń basshysy Nurlan Quttybaevtyń aıtýynsha, qaıta jańartý aıaqtalǵannan keıin ýaqytsha totyrǵyzylǵan jasyl jelekter jaǵalaý boıyna qaıta otyrǵyzylady.
"Eger biz olardy osynda qaldyrsaq, aǵashtar tamyrlanady. Sonymen qatar, jyl sońyna deıin kesilgen aǵashtardyń ornyna on ese mólsherde kóshetter otyrǵyzylady. Bul rette, jasyl ekpelerdi qorǵaý erejelerin eskere otyryp, bıiktigi keminde 4 m bolatyn iri ólshemdi kóshetter otyrǵyzylatyn bolady",-dedi Nurlan Qutybaev.
Eske salsaq, kópirdi qaıta qurý jumystaryn bastamas buryn Esentaı ózeni boıyndaǵy kópir muqıat tekserilip, apatty ekenin anyqtalǵan edi.
"Aralyq qurylystardyń shetki taqtalarynda synǵan betondar bar. Bul tirek aımaǵyndaǵy jumystardy qıyndatyp, betonnyń qorǵanysh qabaty buzylady, bul qaýipti sanatqa jatady, óıtkeni olar aralyq qurylymnyń júk kótergishtigin aıtarlyqtaı tómendetedi. Sondyqtan kópirdi qaıta qurý jumystary bastaldy. Barlyǵy 96 dana kóleminde aralyq qurylystyń plıtalaryn bólshekteý jáne montajdaý josparlanǵan. Jobada jaıaý júrginshilerdiń qaýipsizdigi úshin soltústik jáne ońtústik jaǵynan eki velo-jaıaý kópir qarastyrylǵan. Qurylystyń normatıvtik uzaqtyǵy toǵyz aıdy quraıdy, biraq jumys eki aýysymda jumys kestesinen buryn júrgiziledi. Osyǵan baılanysty kópirdi rekonstrýksıalaýdy oqý jyly bastalǵanǵa deıin aıaqtaý josparlanýda, velosıped-jaıaý júrginshiler kópirlerin jaılastyrý – aǵymdaǵy jyldyń qazan aıynyń ortasyna deıin irgeles aýmaqty abattandyrý boıynsha jumystardy aıaqtaý 2024 jyldyń aqpanyna josparlanǵan", - dep atap ótti Almaty qalalyq mobıldilik basqarmasy jol ınfraqurylymyn damytý bóliminiń basshysy Aıdos Jeldikbaev.
Sonymen qatar, jergilikti turǵyndar da jobamen tanysty. Medeý aýdanynyń turǵyny Arken Ahmetovtyń aıtýynsha, eger jumystyń bári joba boıynsha oryndalsa, onda bul jere adamdardyń serýendeýine óte yńǵaıly bolady.
"Men ózim keshke jaǵalaýda serýendegendi unatamyn. Kópirdiń astyndaǵy baspaldaq balalar men qart adamdardyńa kóterilýi jáne túsýi úshin óte qaýipti. Balaly arbalary bar analar men qosymsha qajettiliktegi jandar úshin pandýstar salý óte paıdaly bolady", - dep atap ótti Arken Ahmetov.