Oǵan qupıa qujattardy zańsyz saqtady jáne taratty dep aıyp taǵylyp, 37 qylmystyq is qozǵaldy.
Búgin Donald Tramp Florıda qalasyna jeke ushaǵymen kelip qondy, dep habarlaıdy Almaty-akshamy.kz.
Ol erteń sot otyryna qatysyp, ózine taǵylǵan aıyptardy tyńdaıdy. AQSH-tyń burynǵy prezıdenti men kómekshisine aýyr aıyptar taǵyp otyr. Onyń ishinde jalǵan kýálik etý, qylmystyq ymyra jasap, qupıa materıaldardy tıisti deńgeıde saqtamady jáne jasyrdy delingen.
Federaldy tergeý búrosy byltyr tamyzda Tramptyń úıin tintip, «asa qupıa» móri bar ondaǵan qujatty tárkilegen edi, dep jazady 24.kz. Onyń bir bóligi tipti úı qoımasynan tabyldy. Qylmystyq isterdiń ár tarmaǵy boıynsha eks prezıdentke qomaqty aıyppul salynyp, tipti birneshe jylǵa deıin bas bostandyǵynan aıyrylýy múmkin.
- Ulttyq qaýipsizdikke qatysty málimetterdi qorǵaıtyn zańdarymyz AQSH úshin óte mańyzdy jáne buljytpaı oryndalýy tıis. Bul zańdardyń buzylýy bizdiń elimizdi qaýip-qaterge ushyratady. Zań ústemdigin saqtaý Ádilet departamentiniń negizgi ustanymy. Sondyqtan bul elde zań talaptary barlyǵyna ortaq, - deıdi qupıa qujattar boıynsha arnaıy keńesshi Djek Smıt.
Aıyptaý aktisiniń eń negizgi bóligin AQSH-tyń ıadrolyq qarý baǵdarlamasy men onyń odaqtastarynyń osal tustary týraly derekter quraıdy. Shabýyl jasalǵan jaǵdaıda, AQSH-tyń qarymta soqqysy qaralǵan qupıa qujattar da Traptyń úıinen tabylǵan.
«Bul derekter qoldy bolsa, halyqaralyq qatynastarǵa, AQSH-tyń áskerı nysandary men tyńshylarynyń qaýipsizdigine, sondaı-aq qupıa barlaý tásilderin odan ári paıdalanýǵa qaýip tóndirýi múmkin», - delingen habarlamada.
Al Tramp osyndaı asa qupıa qujattardyń keıbirin kórýge quqy joq adamdarǵa ashqan.
«Osylaısha eks prezıdent ultqa úlken qater tóndirip, tyńshylyq týraly zań talabyn buzdy», - deıdi prokýrorlar.
Árıne, Donald Trapm ózine taǵylǵan aıyptardy moıyndamady. 2024 jyly ótetin saılaýǵa túsýime kedergi jasamaqshy dep synady.
- Shynymdy aıtsam bul qujattardyń qanshalyqty qupıa bolǵanyn kórip shoshydym. Eger aıyptaý aktisiniń jartysy shyndyqqa janassa, onda eks prezıdent úlken problemaǵa tap boldy degen sóz. Iaǵnı bul - bultartpas aıyptaý. Al Tramptyń ózin saıası oıynnyń qurbany retinde kórsetýge tyrysýy aqymaqtyq, deıdi AQSH-tyń burynǵy bas prokýrory Ýılám Barr.
AQSH-tyń 45-shi prezıdenti 2021 jyly Aq úıdi bosatqan kezde qupıa qujattardy tıisti jerge tapsyrmaǵan. Úkimet qansha suraý salsa da ony qaıtarýdan bas tarqan, tipti olardy bir úıinen ekinshisine kóshirip, Federaldy tergeý búrosynan jasyrýǵa tyrysqan. Buny dáleldeıtin vıdeo jáne aýdıo jazbalar, kýágerlerdiń túsiniktemeleri bar deıdi tergeýshiler. AQSH tarıhynda alǵash ret eks prezıdenttiń ústinen federaldyq deńgeıde qylmystyq is qozǵalyp otyr.