Bilim jáne ǵylym mınıstrligi endi úmitkerler jylyna eki ret magıstratýra men doktorantýraǵa qujattar tapsyra alady degen sheshim qabyldaǵan bolatyn.
Ótinimder joǵary oqý oryndarynyń vırtýaldy qabyldaý komısıalary arqyly qabyldanady, dep habarlaıdy Almaty-akshamy.kz QR BǴM baspasóz qyzmetine silteme jasap.
Magıstratýraǵa bilim berý granttaryn taǵaıyndaý konkýrsyna qatysý úshin qujattardy qabyldaý 10 jeltoqsanda bastalyp, 14 jeltoqsanǵa deıin jalǵasady.
«Osylaısha, qandaı da bir sebepterge baılanysty alǵashqy qabyldaý naýqanynda ótinish berýge múmkindigi bolmaǵan qazaqstandyqtar keshendi testileý tapsyrýǵa jáne magıstratýraǵa túsýge taǵy bir múmkindik aldy. Testti sátti tapsyrǵan úmitkerler jazǵy qabyldaý nátıjeleri boıynsha taǵaıyndalmaǵan granttardy jeńip ala alady. Esterińizge sala keteıin, magıstratýrada oqýǵa arnalǵan bilim berý granttary keshendi testileý nátıjelerine sáıkes konkýrstyq negizde beriledi», – dep atap ótti QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Memlekettik bilim berý tapsyrysy boıynsha jáne aqyly negizde ǵylymı-pedagogıkalyq magıstratýraǵa túsý úshin shekti bal – 75, beıindi magıstratýraǵa túsý úshin - 50 baldy quraıdy.
Qujattardy tapsyrý kezinde oqýǵa túsýshiler bilim berý baǵdarlamalarynyń bir tobyn jáne úsh joǵary oqý ornyn kórsetedi. Magıstratýraǵa bilim berý grantyn taǵaıyndaý konkýrsy bıyl 15-22 jeltoqsan aralyǵynda, oqýǵa qabyldaý 2021 jylǵy 26 jeltoqsan men 2022 jylǵy 10 qańtar aralyǵynda ótedi.