Osylaısha eń úzdik ushqyshtar ekıpajdary «Meniń Týym – meniń Otanym» aksıasyna qatysty.
Qazaqstan Respýblıkasy Táýelsizdiginiń 30 jyldyǵyna oraı Áskerı-áýe kúshteri armıa avıasıasynyń jaýyngerlik tikushaqtary kók aspanda táýelsiz elimizdiń sımvoly – Memlekettik Týdy qalyqtatyp alyp ushty, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Ushqysh-mergender – ÁÁK armıa avıasıasynyń bastyǵy, polkovnık Nurlan Baıdýllaev, avıasıa bazasynyń komandıri, polkovnık Maqsutbek Ádilbaev Mı-171Sh tikushaǵymen elorda aspanynda Qazaqstannyń Memlekettik Týyn qalyqtatyp alyp ushty. Bul kórinisti oryndaýda olarmen tájirıbeli ushqyshtar men shtýrmandar basqarǵan Mı-17 buramaly qanatty tikushaqtar áýede ilesip ushty.
Aksıaǵa qatysýǵa iriktelgen áskerı ushqyshtar – áskerı paradtardyń, «KADEX» qarý-jaraq pen áskerı-tehnıkalyq múlik halyqaralyq kórmesine qatysqandar. Olardyń sheberliginiń arqasynda júzdegen oqý-jaýyngerlik tapsyrmalar sátti oryndalyp, respýblıkalyq jáne halyqaralyq oqý-jattyǵýlar, sondaı-aq baıqaýlar men jarystarda úzdik nátıjelerge qol jetkizildi.
«Tý – ár memlekettiń basty sımvoldarynyń biri, eldiń egemendigi men birtutastyǵynyń belgisi. Qazaqstan halqy úshin mańyzdy kúndi merekeleý qarsańynda oqý-jattyǵý ushýlaryn oryndaý arqyly aksıaǵa qatysýdy jón kórdik», – dedi Áskerı-áýe kúshteriniń qolbasshysy, polkovnık Nurbolat Topaev.
Áýe qorǵanysy kúshteri Qazaqstannyń áýe keńistiginiń qaýipsizdigin kúzetýde. Avıasıa parki jyl saıyn tehnıka men qarý-jaraqtyń zamanaýı úlgilerimen tolyqtyrylyp otyr. Kásibı sheberliktikterin shyńdaý úshin jeke quramǵa qolaıly jaǵdaılar jasalýda.