Almaty onkologıalyq ortalyǵynda sút bezi obyryn erte anyqtaý aılyǵyna arnalǵan Ashyq esik kúni ótti.
Bul sharanyń barysynda 239 áıel onkolog-mammologtyń keńesin aldy. Qaterli isikke kúdigi bar 9 naýqas anyqtalyp, olar últradybystyq zertteýden ótti. Onkologıalyq dıspanserdiń klınıkalyq dıagnostıka bóliminiń meńgerýshisi Naılá Aqjolovanyń aıtýynsha, qajetti qosymsha tekserýlerden keıin áıelderge arnaıy em taǵaıyndalady, dep habarlaıdy Almaty-akshamy.kz.
«Ashyq esik kúni onkolog-mammolog mamandar tekserýler men konsýltasıalardan bólek, áıelderge sút bezin ózdiginen tekserý erejelerin úıretip, kelgenderge sút bezin júıeli túrde mammografıalyq tekserýden ótkizýdiń mańyzdylyǵyn túsindirdi. Sút bezinde qandaı da bir túzilim paıda bolǵan jaǵdaıda, birden mammologqa kóriný kerek», - deıdi maman.
Esterińizge salaıyq, Dúnıejúzilik sút bezi obyryna qarsy kúres kúni aıasynda Almaty onkologıalyq ortalyǵy 2022 jylǵy qazannyń birinen bastap aı boıy ár senbi saıyn (1, 8, 15, 22, 29) sút bezi obyryn erte anyqtaý boıynsha Ashyq esik kúnderin ótkizedi.
Aıta keteıik, Almaty qalasynda 6635 áıel sút bezi qaterli isigi dıagnozymen esepte tur. Statısıkaǵa sáıkes, qalada jyl saıyn 700-ge jýyq sút bezi qaterli isigimen aýyratyn áıel anyqtalady. Kún saıyn qalada osy patologıamen 2 áıel aýyrady. 2021 jyly Almaty qalasynda sút bezi obyrynan 192 áıel qaıtys bolǵan, onyń 50 paıyzy eńbekke qabiletti jastaǵy áıelder.
Almaty onkologıalyq ortalyǵy qalanyń barlyq áıelderin tegin tekserýge shaqyrady.