KSRO áskeriniń Aýǵanstan jerinen shyǵarylǵanyna bıyl 35 jyl toldy. Aýǵan soǵysy tarıh betterinde ózindik iz qaldyrdy.
Ataýly kúnge oraı, jýyrda Almaty qalasy Úılestirý keńesi jáne «Kók Baıraq» ardagerler qoǵamdyq birlestiginiń uıymdastyrýymen Aýǵan soǵysynyń ardagerleri saltanatty túrde bas qosty. Almatydaǵy 28 gvardıalyq panfılovshylar saıabaǵyndaǵy soǵys qurbandaryn máńgi este saqtaý maqsatynda qoıylǵan «Máńgilik alaý» memorıaly mańyna jınalyp, maıdandas dostarynyń qurmetine gúl shoqtaryn qoıdy, jaýyngerlerdiń erligi týraly estelikter aıtyldy. Jat elde, jat mekende jaý oǵynan qaza tapqan maıdandas jaýyngerlerdi bir mınýt únsizdikpen eske aldy. Ardagerler Aýǵan soǵysy jaýyngerlerine qoıylǵan eskertkish alańyna toptasyp, qarýlas baýyrlaryna taǵzym etti. Sondaı-aq qaıtys bolǵan taǵdyrlas baýyrlaryna Ortalyq meshitte Quran baǵyshtap, sharaǵa arnaıy shaqyrylǵan jaýyngerlerdiń ata-analaryna jubatý aıtyp, jyly lebiz bildirdi.
Saltanatty bólimnen keıin shara «Er esimi – el esinde» atty konserttik baǵdarlamaǵa ulasty. Almaty qalasy ákimdiginiń qoldaýymen «Alataý» dástúrli óner teatrynda ótken konsertti 600-ge jýyq kórermen tamashalady. Konsertte Aýǵan ardagerleriniń «Pandjsher» toby, Qazaqstannyń Halyq ártisi Ramazan Stamǵazy bastaǵan mádenıet qaıratkerleri men T.Júrgenov atyndaǵy óner akademıasynyń stýdentteri, B.E.Hasanǵalıev basshylyq etetin P.Chaıkovskıı atyndaǵy Almaty mýzykalyq kolejiniń jastary, sonymen qatar soǵys ardagerleriniń ul-qyzdary óner kórsetti.
Shara barysynda oqý oryndarynda ardagerlermen kezdesýler uıymdastyryp, jastardy otansúıgishtikke baýlýǵa, patrıottyq tárbıe berýge úlken úles qosyp júrgen birqatar kásiptik-tehnıkalyq jáne orta bilim berý mekemeleriniń basshylary, ardagerler emhanasy men aýrýhana basshylary, BAQ ókilderi Alǵys hatpen marapattalyp, ardagerlerge qórsetip jatqan kómek-qoldaýlaryna alǵys aıtyldy. Konsertke qatysýshylar ardagerlerge qurmet kórsete otyryp, denege túsken jara ýaqyttyń ótýimen jazylar bolsa, júrekke túsken syzdyń eshqashan jazylmaıtynyn, erlik umytylmaıtynyn jetkizdi.
«Otan úshin kúres – erge tıgen úles». Halqymyzdyń osy danalyǵy qashanda júrek dápterinde, sana sahnasynda saqtaýly bolsa, jas urpaq azamattyq paryzyna adal bolary anyq. Elimiz qaharman uldaryn qashanda pana tutqan, Aýǵan soǵysy qaharmandaryn qadirlep, qurmetteýi de – sonyń aıǵaǵy.
Óter jyldar, aılar taǵy alystap,
Taǵdyr talaı taýqymetin tabystar.
Ózderińdi jyrlap óter urpaǵyń,
Aýǵandaǵy azap shekken arystar!..
Rasymen de, ómir toqtamaıdy, erlik ólmeıdi, jyldar jalǵasa beredi. Buǵan dálel – búgingi ortamyzda júrgen aýǵandyq jaýyngerlerimiz. Olardyń beıbit ómirdegi jarqyn isteri, qoǵamdyq jumystaǵy belsendilikteri, túrli kásip salasyndaǵy jetistikteri el maqtanyshy ekeni daýsyz. Sol bir otty jyldary aýǵan jerinde qarý asynyp, týǵan elge degen saǵynysh pen soǵys taýqymetin arqalaı júrip, birin biri baýyr desken azamattar aıtýly keshte qushaqtary aıqasyp, qýanyshpen qaýyshty. Baqılyq bolǵan qarýlas dostaryn eske alyp, rýhyna taǵzym etti.
Keńes áskeriniń Aýǵanstan jerinen shyǵarylýyna 35 jyl tolýyna jáne ınternasıonalıs-jaýyngerlerdi eske alýǵa arnalǵan merekelik sharany uıymdastyrýǵa qoldaý kórsetken Almaty qalasy ákimdigine, Alataý aýdandyq mádenıet bólimine, Qazaqstannyń mádenıet qaıratkerlerine, jas ónerpazdarǵa Almaty qalasy Úılestirý keńesi, «Namys » jáne «Kók baıraq» ardagerler qoǵamdyq birlestigi alǵys bildirdi.