Bul týraly Májilis depýtaty «AMANAT» partıasynyń janyndaǵy Sybaılas jemqorlyqqa qarsy is-qımyl jónindegi Respýblıkalyq keńestiń Atyraý qalasynda ótken kóshpeli otyrysy barysynda aıtty, dep habarlaıdy Almaty-akshamy.kz AMANAT partıasynyń telegram-kanalyna silteme jasap.
Ol partıa janyndaǵy Keńestiń músheleri respýblıkaǵa belgili zańgerler, memleket qaıratkerleri men qoǵam belsendileri jáne depýtattar ekenin alǵa tartty. Onyń aıtýynsha, jemqorlyqqa qarsy keńes óz jumysy barysynda tek óńirlerdegi problemalarǵa ǵana emes, elimizde azamattar keń talqylap júrgen eń rezonansty máselelerge basa mán beredi. Osy oraıda Keńes tóraǵasy jınalǵandardyń nazaryn ROP operatoryna qatysty máselege aýdardy.
«Ádiletti Qazaqstannyń kirpishi zańdy oryndaýdaǵy shyndyqtan quralady. Barlyǵy zań jáne zańdy quqyqqa sáıkes bolýy kerek. Barshamyzǵa belgili jaqynda ROP dep atalatyn uıym basshylarynyń birqatary qylmystyq jaýapqa tartyldy. Sot barysynda kóptegen kýágerler jemqorlyqqa qarjynyń túpki benefısıary Álıa Nazarbaeva dep kórsetti. Biraq sot ta, Bas prokýratýra ókilderi de sot prosesinde bul azamattardyń ýájine eshqandaı nazar aýdarmady. Eger Qazaqstanda ádiletti qoǵam ornatamyz desek, ózine qatysty osyndaı kýágerlik berilgen árbir azamat kinásizdigin sotqa kelip dáleldeýi qajet», - dedi depýtat.
Sondaı-aq ol azamattardyń ýájin mindetti túrde Bas prokýratýraǵa jetkizetinin jáne bul másele Keńestiń baqylaýynda bolatynyn alǵa tartty.