Búgin QR Parlamenti Májilistiń tóraǵasy laýazymyna Erlan Qoshanov saılandy, dep habarlaıdy Almaty-akshamy.kz QazAqparatqa silteme jasap.
Atap aıtqanda, QR Konstıtýsıasy 58-babynyń 1-tarmaǵyna sáıkes, QR Parlamenti Májilisiniń tóraǵasy memlekettik tildi erkin meńgergen depýtattar arasynan Palata depýtattary jalpy sanynyń kópshilik daýsymen jasyryn daýys berý arqyly saılanady.
Erlan Qoshanovtyń kandıdatýrasyn Májilis depýtaty Baqtyqoja İzmuhambetov usyndy.
Daýys berý nátıjesi boıynsha palata depýtattary QR Parlamenti Májilisiniń tóraǵasy qyzmetine Erlan Jaqanuly Qoshanovty biraýyzdan saılady.
Sonymen qatar Májilis tóraǵasynyń orynbasarlary saılandy.
«QR Parlamenti jáne onyń depýtattarynyń mártebesi týraly» Konstıtýsıalyq zańy 9-baby 8-tarmaǵyna sáıkes, palata depýtattary arasynan Májilis tóraǵasynyń usynýymen palata depýtattary jalpy sanynyń kópshilik daýysymen saılanatyn 2 orynbasary bolady. Sondyqtan ózime berilgen quqyqty paıdalana otyryp, Parlament Májilisi tóraǵasynyń orynbasary laýazymyna aldymen Májilis depýtaty Albert Raýdyń kandıdatýrasyn usynamyn», - dedi Májilis tóraǵasy Erlan Qoshanov palatanyń jalpy otyrysy barysynda.
Daýys berý barysynda otyrysqa qatysqan 97 depýtattyń 96-sy Albert Raýdyń kandıdatýrasyn qoldap, 1 depýtat qalys qaldy.
Osydan keıin Májilis tóraǵasy 2-shi orynbasary laýazymyna Danıa Espaevanyń kandıdatýrasyn usyndy.
«Danıa Mádıqyzy - tájirıbeli ekonomıs. Kóp jyl basshylyq qyzmette, bank sektorynda jumys istedi. 7-shi saılanymdaǵy Qarjy jáne búdjet komıtetiniń hatshysy bolyp, zań shyǵarý qyzmetine belsene atsalysty. Ózin kásibı maman retinde kórsete bildi», - dedi Erlan Qoshanov.
Danıa Espaevanyń kandıdatýrasyn 94 depýtat qoldady, bir depýtat daýys bergen joq, 2 depýtat qalys qaldy.