Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komısıanyń kezekti otyrysy ótti, dep habarlaıdy Almaty-akshamy.kz akorda.kz silteme jasap.
Otyrysta Memlekettik komısıanyń ǵylymı jáne baspa qyzmetiniń nátıjeleri qaraldy, arhıvterdegi zertteýlerden jınalǵan materıaldar zerdelendi, elektrondyq portaldyń jumysy týraly aqparat berildi.
Sondaı-aq óńirlik komısıalardyń jumysy týraly esep tyńdalyp, olardyń ǵylymı jınaqtaryn daıyndaý jónindegi jobalardyń iske asyrylý barysy qaraldy.
Sonymen qatar jıynda Memlekettik komısıa músheleri arhıvterde júrgizilgen zertteý jumystary barysynda tabylǵan, jazýshy ári aqyn Júsipbek Aımaýytov jazdy delingen «Ázir ólmeımin» («Tez ólmen») shyǵarmasyn tanystyrdy. Ol Prezıdent Arhıviniń ǵylymı-izdestirý jumystary kezinde tabylǵan bolatyn. Prezıdent Arhıviniń dırektory Á. Mustafına shyǵarmanyń qalaı tabylǵany jáne oǵan júrgizilgen zertteý jumystary jaıynda aıtty. Atalǵan shyǵarmany fılologtar men ádebıettanýshylar taǵy da zertteıtin bolady.
Otyrys qorytyndysy boıynsha ǵylymı-zertteý qyzmetin jalǵastyrýǵa, óńirlik komısıalardyń materıaldaryn shyǵarýdy júıelendirýge, jabyq qorlardyń materıaldaryn sıfrlandyrý jáne qupıasyzdandyrý jónindegi jumysty qamtamasyz etýge baǵyttalǵan tapsyrmalar berildi.