Erlan Qarın atom elektr stansıasyn salý máselesine qatysty aldaǵy referendýmnyń mańyzdylyǵy týraly aıtty
Memlekettik keńesshi Erlan Qarın Qostanaı qalasynda oblys ákimi Qumar Aqsaqalovtyń, óńirdegi qalalar men aýdan ákimderiniń, memlekettik organdar jetekshileriniń qatysýymen ishki saıasat máselelerine qatysty aımaqtyq keńes ótkizdi.
Jıynda Memleket basshysynyń Joldaýynda belgilengen mindetterdi júzege asyrý joldary, ishki saıasat baǵytyndaǵy jumys barysy, etnosaralyq jáne konfesıaaralyq kelisimdi nyǵaıtý, onomastıka, aqparat salasy jáne jastar saıasaty máseleleri talqylandy.
Memlekettik keńesshi oblystaǵy birqatar mektep dırektorlarymen kezdesip, «Birtutas tárbıe» atty jańa baǵdarlamany júzege asyrý máselesine qatysty pikir almasty.
Sondaı-aq, Erlan Qarın QR Prezıdenti janyndaǵy Jastar saıasaty jónindegi keńestiń kóshpeli otyrysyn ótkizdi. Keńes músheleri jastardy jumyspen qamtý jáne jumysshy mamandyqtardyń mártebesin kóterý máselelerin talqylady. Bul basqosý aımaqtaǵy eń iri óndiris ortalyǵy sanalatyn «Allur» zaýytynyń alańynda ótti. Oǵan osy kásiporynnyń jas mamandary qatysty.
Erlan Qarın Keńestiń jastar saıasatynyń ózekti máselelerin sheshýge bastamashy bolyp, Prezıdenttiń jastarǵa qatysty reformalaryn júzege asyrýǵa belsendi qatysyp kele jatqanyn atap ótti.
Sonymen qatar, Memlekettik keńesshi avtomobıl kóligi kolejiniń stýdentterimen kezdesti. «Prezıdenttiń 2025 jyldy «Jumysshy mamandyqtar jyly» dep jarıalaýy memlekettiń kásiptik bilim berý isin odan ári damytýǵa múddeli ekenin bildiredi», – dedi Erlan Qarın.
Budan bólek, ol Joldaýdy tıimdi júzege asyrýdyń jáne atom elektr stansıasyn salý máselesine qatysty aldaǵy referendýmnyń mańyzdylyǵy týraly sóz qozǵady.
Memlekettik keńesshi ótkizgen kezdesýlerdiń qorytyndysy boıynsha quzyrly organdarǵa ishki saıasat salasyndaǵy jumysty jetildirý boıynsha naqty usynystar men tapsyrmalar berildi.