Almatyda búgin robototehnıkadan «Robocon 2021» ekinshi respýblıkalyq chempıonaty ótýde.
«Robocon 2021» robototehnıka chempıonatynyń ashylýynda sóz sóılegen Almaty qalasy ákiminiń orynbasary Erjan Babaqumarov «Almaty jas talanttar men batyl bastamalarǵa ashyq» ekenin aıtty, dep habarlaıdy Almaty-akshamy.kz
Almaty qalasy ákiminiń orynbasary Erjan Babaqumarov chempıonatty ashyp, bul sharanyń Qazaqstan Respýblıkasynyń Tuńǵysh Prezıdenti kúnine jáne Qazaqstan Respýblıkasy Táýelsizdiginiń 30 jyldyǵyna oraılastyrylǵanyn atap ótti.
«Búgingi jahandyq báseke – tehnologıa básekesi. Robototehnıka – tehnologıalyq serpilistiń negizgi baǵyttarynyń biri. "Robocon 2021" kásibı ósý, qarym-qatynas jáne shyǵarmashylyq úshin jańa múmkindikter ashady. Chempıonatty bolashaqta álemdik tehnologıa naryǵyndaǵy básekelestikke daıyndyq retinde qarastyrýǵa bolady. Chempıonatqa qatysýshy – IT, elektronıka jáne robototehnıka salasynda ǵylymmen aınalysatyn daıyn jas maman. Almaty jas talanttar men batyl bastamalarǵa ashyq», - dedi Erjan Babaqumarov.
Bıylǵy chempıonatqa elimizden 13 stýdenttik komanda qatysýda. Robototehnıka baıqaýy jas ǵalymdarǵa dızaın men mehanıkadan, elektronıkadan bastap, robotty ıntellekt baǵdarlamasyn jazýǵa deıin robottardy ázirleýdi nólden bastaýǵa múmkindik beredi.
Chempıonattyń negizgi maqsaty – Qazaqstan jastarynyń ózderiniń startap jobalaryn ári qaraı júzege asyrýy jáne Qazaqstannyń ınovasıalyq qyzmetine belsendi qatysýy úshin zamanaýı tehnıkalyq bilim berý, sondaı-aq daryndy jastardy anyqtaý, oqytý, irikteý jáne qoldaý bolyp tabylady.
Óz kezeginde Nursultan Nazarbaev Qorynyń Almatydaǵy ókildiginiń dırektory Sergeı Toqtarov chempıonat qazaqstandyq stýdentter ózderin jáne robototehnıkada myqty jaqtaryn kórsete alatyn, tálimgerlerdiń qoldaýyna ıe bolyp, Qazaqstanda sıfrlandyrýdy damytýǵa óz úlesterin qosatyn aýqymdy alań ekenin atap ótti. Nursultan Nazarbaev Qory daryndy jas qazaqstandyqtardy anyqtaý jáne qoldaý maqsatynda respýblıkanyń jas býynynyń daryndylyǵyn ashýǵa baǵyttalǵan osyndaı jobalardy belsendi túrde qoldaıdy.
Elordadan tikeleı efırge shyqqan Qazaqstan Respýblıkasy Bilim jáne ǵylym vıse-mınıstri Qýanysh Erǵalıev 2019 jyly birinshi chempıonat joǵary deńgeıde ótkenin, oǵan otandyq joǵary oqý oryndary stýdentteriniń bastamashyl toptary qatysqanyn, robottardy shyǵarý úshin tolyq jabdyqtalǵan jańa robototehnıka zerthanalary salynǵanyn atap ótti. «ETU Robocon 2021» kórmesine Nur-Sultan, Almaty, Qyzylorda, Pavlodar, Óskemen jáne Almaty oblysynyń stýdenttik komandalary qatysýda.
Baıqaýǵa stýdentter eki robot qurastyrdy – avtomattandyrylǵan jáne basqarylatyn.
Birinshisiniń mindeti – ımprovızırli planetaǵa «zymyran» jiberý, al ekinshisi belgili bir traektorıa boıynsha qozǵalyp, tesikke sharlardy túsirýi tıis. Barlyq robottar nólden jáne qolda bar quraldardan - kartonnan, plasıkten, metaldan, batareıalardan, arqandardan jáne t.b. qurastyrý arqyly jasaldy. Negizgi shart - qurylǵy Arduino platformasynda jumys isteýi kerek. Bul óziniń prosesory men jadysy bar shaǵyn taqta. Barlyq qajetti parametrleri bar aldyn ala jazylǵan baǵdarlama prosesorǵa júkteledi, ol arqyly robot basqarylady. Barlyq is-sharalar arnaıy jabdyqtalǵan oıyn alańynda ótedi.
Jalpy, is-shara robot jasaý salasyn damytýǵa jáne eldegi sıfrlandyrý deńgeıin kóterýge múmkindik beredi.