Kómek kórsetýge qala turǵyndary, kásipkerler men belsendi jastar qatysty. Bul týraly Óńirlik komýnıkasıalar qyzmetiniń brıfıńinde Almaty qalasy eriktiler front-keńsesiniń basshysy, «QAMQOR CHARITY» qoǵamdyq qorynyń tóraǵasy Baǵdat Anarbaeva málimdedi, dep habarlaıdy almaty-akshamy.kz
Onyń aıtýynsha, 2024 jyldyń 29 naýryzynan 15 sáýirine deıin Almaly aýdanynyń komúnıtı ortalyǵy bazasynda Almaty qalasy Jastar saıasaty basqarmasynyń qoldaýymen ashylǵan Qazaqstannyń sý tasqynynan zardap shekken óńirlerine gýmanıtarlyq kómek qabyldaý pýnkti jumys istedi. Pýnkt kún saıyn saǵat 10:00-den 19:00-ge deıin jumys istedi. Saǵat 19:00-den 24: 00-ge deıin eriktiler gýmanıtarlyq kómekti sanaý jáne jınaqtaý boıynsha jumys júrgizdi.
Kún saıyn almatylyqtar qajetti zattardy ákelip, zardap shekken óńirlerge kómek kórsetýge óz úlesterin qosty.
«Kómek jınaý pýnktiniń jumysyna qalanyń 30-dan astam iri volonterlik uıymdary, 200 volonter jáne radıoelektronıka jáne baılanys áskerı - ınjenerlik ınstıtýtynyń 100-den astam kýrsanttary jumyldyryldy», - dedi Baǵdat Anarbaeva.
Eriktilerdiń negizgi bóligi gýmanıtarlyq kómekti qabyldaý, oraý jáne jınaqtaý jumystaryna tartyldy. Sonymen qatar, eriktilerdiń jekelegen bóligi zardap shekken aımaqtarǵa tikeleı kómek kórsetti. Almaty qalasynan eriktiler Atyraý, Batys Qazaqstan jáne Aqtóbe oblystaryna jiberildi.
Gýmanıtarlyq kómek jınaý pýnktiniń jumysyna buqaralyq aqparat quraldary, blogerler men medıa tulǵalar úlken aqparattyq qoldaý kórsetti.
«Kún saıyn eriktiler front-ofısiniń koll-ortalyǵyna qala turǵyndarynan 1000-nan astam qońyraý kelip tústi. Gýmanıtarlyq kómek qabyldaý pýnktine kúnine 500-den astam adam keldi. Osy múmkindikti paıdalana otyryp, gýmanıtarlyq kómek jınaýdyń alǵashqy kúnderinen bastap úlken belsendilik tanytyp,beı-jaı qaramaǵan Almaty qalasynyń barlyq janashyr turǵyndaryna jeke alǵys bildirgim keledi», - dep bólisti B.Anarbaeva.
Aǵymdaǵy jyldyń 29 naýryzy men 15 mamyry aralyǵynda 592 tonna gýmanıtarlyq kómek jınaldy (200 tonna – azyq – túlik, 147 tonna – gıgıenalyq quraldar, 70 tonna – kıim, qalǵan 35 tonna-turmystyq zattar), olardan jóneltilgenderi:
- Oralǵa 70 tonna (40-avıareıspen, 30-fýramen);
- Aqtóbe oblysyna 44 tonna (40-fýrammen, 4-avıareıs);
- Atyraý oblysyna 268 tonna (13-avıareıspen, 253-fýramen);
- Qostanaı oblysyna 70 tonna (10-júk kóligi, 60-fýra);
- Petropavlǵa 140 tonna (65 – júk kóligi, 35 – "Mitsubishi Delica" markaly avtomobılder, 40-fýramen).
Brıfıńke qatysqan «Jas Live» jastar medıa-ortalyǵynyń basshysy Meıirjan Kelmedenov eriktilerdiń sý basqan aýdandardyń turǵyndaryna qalaı kómekteskenin aıtyp berdi.
«Bizde Almaty qalasynan sý basqan óńirlerge, sonyń ishinde ózimizdi qosa alǵanda, barǵan eriktiler boldy. Tótenshe jaǵdaıdyń alǵashqy kúnderinde 10 tonna gýmanıtarlyq kómek jiberilip, Oral qalasyna eriktiler jiberildi. Sodan keıin biz óńirlerdiń qajettilikterine qaraı Almatydan Atyraý oblysy men Aqtóbe qalasyna 50 - ge jýyq erikti jiberdik», - dedi ol.
Sondaı-aq, eriktiler basqalardyń qıyn jaǵdaıda qalǵanyna beı-jaı qaramaıtynyn jáne kez kelgen ýaqytta belsendi qoldaý kórsetýge daıyn ekenin aıtty.
Brıfıń sońynda spıkerler almatylyqtarǵa ıgi iste kórsetken belsendiligi men qoldaýy úshin alǵys bildirdi.