Kóp izdenip, kitaptar oqydym
Jetisaı aýdany Asyq ata aýylynyń turǵyny Madına Dáýrenbek elektr qýaty arqyly jarqyraıtyn gúldermen kómkerilgen shamdar jasaıdy. Erekshe dızaınmen ázirlenetin buıymdardyń sapasy joǵary, baǵasy da arzan. Sondyqtan qyzyǵýshylar da kóp. Bul týraly QazAqparat jazdy.
Madınany qolónerge ákesi Altaı baýlyǵan. Oǵan perde, quraq kórpe, sáýkele sekildi ulttyq naqyshtaǵy kıimderdi tigý esh qıyndyq týdyrmaıdy. Al monshaqtardan túrli buıymdar jasaý – súıikti isi. Madına ýaqyt óte kele boıyndaǵy bar qabiletin kásipke qaraı burýdy oılaıdy.
«Kóp izdenip, kitaptar oqydym. Ǵalamtor arqyly jaryqshamdardyń jasalý joldaryn úırendim. Sonymen alǵashqy jasaǵan dúnıelerimdi ınstagram arqyly saýdaǵa shyǵardym. Tez ótip ketti. Suranystyń joǵary ekendigi maǵan shabyt syılady» – deıdi ol.
Negizgi tutynýshylary – Aqtaý, Atyraý, Aqtóbe, Qaraǵandy, Qyzylorda, Óskenmen qalalarynyń turǵyndary. Gúl, korzına, qýyrshaq keıpinde jasalǵan buıymdaryn aptasyna bir ret tapsyrys berýshilerge poshta arqyly salyp jiberedi. Al jaqyn mańdaǵy qalalarǵa avtobýstardyń qyzmetin paıdalandy. Madına jasaǵan zattardy alǵan adamdar sapasy boıynsha áli eshqandaı syn aıtpaǵan.
«Alǵashqyda 30 000 teńgemen bastaǵan bıznesimnen qazir aıyna 400-500 myń teńge taýyp otyrmyn. Qajetti zattardy Reseıden arnaıy tapsyryspen aldyramyz» – deıdi ol.
Qolónershi kelinshek «Bıznes bastaý» kýrsyna qatysyp, 505 000 teńge grantty jeńip alǵan. Ol qarjyǵy qajetti qurylǵylardy satyp alypty. Endigi maqsaty kásibin keńeıtip, jańa seh salý.
«Kúnine 50 danaǵa deıin jaryqshamdar jasaımyn. Eń arzany 4 000 teńgeden bastalady. Qazir úıdegi bir bólmemdi seh retinde paıdalanyp kelemin. Aldaǵy ýaqytta jańa seh salýdy josparlap otyrmyz» – deıdi turǵyn.