Erbolat Dosaev: Almatyda jylytý maýsymy shtattyq rejımde ótýde
Almaty qalasynyń ákimi Erbolat Dosaev jumys keńesin ótkizdi, jıynda 2023-2024 jyldardaǵy jylytý maýsymynyń barysy qaraldy, dep habarlaıdy Almaty-akshamy.kz.
Energetıka jáne sýmen jabdyqtaý, komýnaldyq ınfraqurylymdy damytý, bilim basqarmalarynyń basshylary, sondaı-aq «Almaty jylý jelileri» JSHS, «AlmatyJylýKommýnEnergo» JSHS, «Almaty Sý» MKK, «Almaty elektr stansıalary» AQ, «Alataý Jaryq kompanıasy» AQ jáne «QazTransGazAımaq» AQ basshylary jylytý maýsymynyń aǵymdaǵy ótýi týraly baıandady. Almatyny jylýmen jabdyqtaý JEO-1,2, «AlES» AQ BJK (65%) jáne «ATKE» JSHS-niń 84 jergilikti qazandyǵy (35%) esebinen qamtamasyz etiledi.
Búgingi tańda qalada barlyq áleýmettik nysandar men kóppáterli turǵyn úıler (KTÚ – 8 863, bilim berý obektileri – 404, densaýlyq saqtaý obektileri - 128) úzdiksiz jylýmen qamtamasyz etilgen. Jylý kózderinde jáne jylý jelilerinde temperatýralyq rejım bekitilgen kestege sáıkes saqtalady. Ákimge jylý berý maýsymy kezinde qala qyzmetteriniń joǵary daıyndyq rejıminde jumys isteıtini baıandaldy. Shtattan tys jaǵdaılardy ýaqtyly joıý úshin barlyq qajetti qurylǵylarmen jabdyqtalǵan apatty joıý brıgadalary jumys isteıdi. Bul iske barlyǵy 400-ge jýyq adam, 100-den astam arnaıy tehnıka jumyldyrylǵan.
Megapolıs basshysy ınfraqurylymnyń tozýyn azaıtýǵa baǵyttalǵan ınvestısıalyq baǵdarlamany iske asyrýǵa basa nazar aýdardy. Almaty qalasy boıynsha jylý jelileriniń jalpy tozýy 59,2%-dy qurady, 2023 jyly júrgizilip jatqan sharalar josparlanǵan 0,6% ornyna tozýdy 1,3% - ǵa qysqartýǵa múmkindik berdi. Osylaısha, aǵymdaǵy jyldyń basynda 25 jyldan astam ýaqyt paıdalanylyp, tozǵan jelilerdiń uzyndyǵy 802,6 km nemese jelilerdiń barlyq uzyndyǵynyń 57,9%-yn quraıdy.
Aǵymdaǵy jyly jalpy uzyndyǵy 20 km jylý jelilerin rekonstrýksıalaý boıynsha jumystar júrgizý josparlanýda, bul jylý jelileriniń tozýyn 1,8% - ǵa tómendetýge múmkindik beredi.
Keńestiń qorytyndysy boıynsha qala ákimi Erbolat Dosaev jylý berý maýsymyn turaqty ári úzdiksiz ótkizý qala úshin strategıalyq mańyzdy mindet ekenin atap ótti. Jylytý maýsymy áli jalǵasýda, sondyqtan qalalyq qyzmetterge qala turǵyndaryn turaqty jáne úzdiksiz jylýmen qamtamasyz etý máselesin baqylaýda ustaý tapsyryldy.