Almaty polısıasy jyl qorytyndysyn shyǵardy
Almaty polısıasy ótken jyldyń jumysyn qorytyndylady. Kún tártibinde İshki ister mınıstrliginiń keńeıtilgen alqa májilisinde Memleket basshysy Qasym-Jomart Toqaev naqtylaǵan máseleler bar, dep habarlaıyd almaty-akshamy.kz
Qazaqstan Respýblıkasynyń Prezıdenti óz sózinde, polısıanyń elimizde “Zań jáne Tártip” qaǵıdatyn qalyptastyrýda mańyzdy ról atqaratynyn atap ótti. Memleket basshysynyń aıtýynsha, árbir azamat ózin qaýipsiz sezinýi kerek. Sondyqtan quqyq qorǵaý júıesi úılesimdi ári tıimdi jumys isteýi kerek.
– Qazaqstan Respýblıkasy Prezıdentiniń azamattardyń, ásirese balalardyń qaýipsizdigin qamtamasyz etý, olardyń konstıtýsıalyq quqyqtaryn qorǵaý, turmystyq zorlyq-zombylyqtyń aldyn alý, zańdylyq pen quqyqtyq tártipti qamtamasyz etý, jazataıym oqıǵalardy azaıtý, azamattardyń quqyqtyq saýattylyǵyn arttyrý, halyqty kóshi-qondy baqylaýdy kúsheıtý, esirtki qylmysymen kúresý, sondaı-aq jeke quram arasyndaǵy tártip pen zańdylyq jónindegi tapsyrmalaryn oryndaý máseleleri qaraldy. İshki ister mınıstriniń aǵymdaǵy 2024 jyldy Kadrlar sapasyn arttyrý jyly dep jarıalaýy, basshylardyń basty nazaryn qaramaǵyndaǵy qyzmetkerlerdiń adamgershilik qasıetterin arttyrýǵa aýdarý kerektigin atap ótkim keledi. Qasym-Jomart Toqaev atap ótkendeı, qoǵammen birge polısıa da túbegeıli ózgerýi kerek, – dedi qorytyndy jıynda Almaty qalalyq polısıa departamentiniń bastyǵy Arystanǵanı Zapparov.
Almaty qalasynyń bas polıseıi jıynǵa qatysýshylardyń nazaryn shahardaǵy qylmystyq ahýaldy jaqsartýǵa baǵyttalǵan profılaktıkalyq sharalardy kúsheıtýge, sondaı-aq qaladaǵy qoǵamdyq tártipti saqtaýǵa jurtshylyqty belsendi tartýǵa aýdardy.
– Profılaktıkalyq jumysty mektep basshylyǵymen birge kúsheıtý qajet. Bul jumysqa azamattyq qoǵam ınstıtýttary men sarapshylardy tartý qajet. Balalarǵa oń tárbıe berý úshin quzyrly qyzmettermen birlesip, balalardyń túrli úıirmeler men sport seksıalaryna barýyn qamtamasyz etý, olardyń sabaqqa qatysýyn qadaǵalaı alýy úshin birlesken jumysty uıymdastyrý qajet. Sonymen qatar qorqytý, qorlaý jáne bopsalaý derekterin anyqtaý úshin jasóspirimder men jastar arasynda maqsatty is-sharalardy ótkizýge jedel qyzmetterdi baǵdarlaýǵa erekshe nazar aýdarý qajet, – dedi Arystanǵanı Zapparov.
Sonymen qatar jıyn barysynda Arystanǵanı Zapparov jergilikti polısıa qyzmetine balalardyń qaýipsizdigin qamtamasyz etip, jasóspirimder arasyndaǵy qylmystyń aldyn alýdy kúsheıtýdi tapsyrdy. Spıker quqyq buzýshylyqtyń aldyn alý máselesine de toqtalyp, quqyq buzýshylyqtyń aldyn alýdyń tolyqqandy júıesin qalyptastyrý, olardyń jasalý sebepterin joıý baǵytynda maqsatty jumystar júrgizý qajettigin aıtty.
Jedel keńestiń qorytyndysy boıynsha PD basshysy Almaty polısıasynyń qyzmetin odan ári jetildirýge baǵyttalǵan birqatar naqty tapsyrmalar berip, qyzmette erekshe kózge túsken polısıa qyzmetkerlerin marapattady.