Suraq:
Bostandyq aýdanynda ótken kezdesýde turǵyndar Buqar jyraý býlvary men Esentaı ózeniniń qıylysynda josparlanǵan turaqtyń qurylysyna qatysty suraq qoıdy.
«Biz jobany kórgen joqpyz jáne TJ kezinde skversiz jáne jınalatyn orynsyz qalamyz ba dep qorqamyz. Bos, jasyl keńistik qala ma?».
Jaýap:
Almaty ákimi 200 kólikke arnalǵan kóp deńgeıli avtoturaq salý qajettigin atap ótti, óıtkeni atalǵan TÚK aýlasy men Buqar jyraý býlvarynda kólik kóp. Bul jedel járdem, órt sóndirý qyzmeti mashınalarynyń ótýine kedergi keltiredi. Joba aýla men býlvarǵa túsetin júktemeni azaıtýǵa múmkindik beredi, TJ kezinde jasyl aımaqtar men jınaý orny qarastyrylǵan. Ýchaske komýnaldyq menshikte, sondyqtan ákimdik jobaǵa sáıkes qurylystyń barysyn qatań qadaǵalaıdy.
«Qala men onyń turǵyndary úshin jumys istep jatqanymyzdy bilesiz. Qala alǵa jyljyp, durys damyp keledi. Biz birneshe jyl boıy qordalanǵan túıtkildi máselelerdi sheshýge tyrystyq. Qalaǵa tıesili aýmaqtarda jasyl aımaqtar men oıyn alańdary qurylady. Byltyr skverler men saıabaqtar úshin 37 mlrd teńgege jer satyp alyndy, bıyl taǵy 45 mlrd teńgege jer telimderin satyp alýdy josparlap otyrmyz. Qalanyń qajettiligi eleýsiz qalmaıdy. Aqylǵa qonymdy teńgerim qalpyna keltiriledi», - dep Erbolat Dosaev eki myńynshy jyldardyń basynda jekeshelendirilgen ýchaskeler turǵyndar úshin satyp alynatynyn atap ótti.
Buǵan deıin, Bostandyq aýdanyn damytý jónindegi baıandamada qala ákimi Abaı jáne Gagarın dańǵyldarynyń qıylysynda aýdany 1 ga ýchaskeni abattandyrý jalǵasyp jatqanyn habarlady. Bıyl tamyzda balalar jáne sport alańdary, ıtterdi serýendetý aımaqtaryn salý, demalýǵa arnalǵan oryndyqtar ornatý jáne sýarý júıesi bar jasyl jelekter aıaqtaý kózdelgen.
Buǵan qosa, bıyl Tuńǵysh Prezıdent saıabaǵyn, «Atakent» QİYO aýmaǵyn jáne «Iýjnyı» saıabaǵyn qaıta qurý men abattandyrý aıaqtalady. Sonymen qatar, sırk aldyndaǵy, Mustafın kóshesiniń boıyndaǵy jáne ál-Farabı atyndaǵy QazUÝ stýdentter saraıynyń aldyndaǵy sýburqaqtar kúrdeli jóndeýden ótedi.