Jep-ishýden ǵana emes, kúná ataýlydan, jamandyqtan tıylý maýsymy.
Almaty qalasynyń Bas ımamy Tólebı Ospan qala turǵyndaryn Ramazan aıymen quttyqtady, dep habarlaıdy Almaty-akshamy.kz
Assalaýma ǵalaıkým, qadirmendi qaýym! Qasıetti Ramazan aıyna aman-esen jetkizgen Uly Jaratýshy Jabbar Iemizge madaq-maqtaýlar bolsyn! Berekeli Ramazan aıymen barshańyzdy shyn júrekten quttyqtaımyn!
Ramazan – tıylý aıy. Jep-ishýden ǵana emes, kúná ataýlydan, jamandyqtan tıylý maýsymy. Ásili, kúni boıy ash júrip oraza ustaý qıyn emes. Eń qıyny on eki múshemizge oraza ustatý.
Paıǵambar ósıetinde: «Kimde-kim jaman sózi men jaman is-áreketten tıylmasa, onyń tamaq jeýden jáne sýsyn ishýden tıylǵany Alla Taǵalaǵa eshbir keregi joq», - degen.
Sonymen qatar kórnekti ǵalym Imam Ǵazalı «Orazanyń úsh deńgeıi bar», – degen. Olar: «Kópshiliktiń orazasy (ýmým), erekshe oraza (hýsýs) jáne arnaıy oraza (hýsýs ál-hýsýs). Kópshiliktiń orazasy – asqazan men qumarlyqtan tyıylý. Erekshe oraza – qulaq pen kózdi, til men qol-aıaqty jáne basqa da dene múshelerin kúná ataýlydan tyıý. Al, arnaıy oraza – júrek orazasy. Bul – jaman oı men dúnıelik pikirden tutastaı arylyp, Alladan basqa barlyq oıdan tolyǵymen tyıylý», – deıdi.
Demek, dene-múshelerimizdi teris is-áreketten tyıý oraza talaptarynyń biri. Sol sebepti, kóppen kórgen uly toı dep tek tańerteńnen keshke deıin iship-jeýden tıylý ǵana emes, orazanyń joǵaryda aıtylǵan tárbıelik taǵylymyna mán bergenimiz jón.
Almaty meshitterinde qasıetti Ramazan aıyn atap ótý úshin arnaıy jospar bekitildi. Qala meshitteriniń daıyndyqtary pysyqtaldy. Bıyl qaladaǵy 54 meshittiń 50-inde taraýıh namazynda quran hatym túsirilip, eldiń amandyǵy úshin duǵa jasalady.
Ramazan aıynda oryndalatyn saýapty isterdiń biri – kópshilikke aýyzashar dastarhanyn jaıý. Almaty ortalyq meshitinde «Ramazan shatyry» qurylyp, kúndelikti 500 kisige aýyzashar dastarhany jaıylmaq. Sondaı-aq, qala meshitterinde de aýyzashar beriledi. Aýyzashar bergisi keletin kisiler qala meshitterindegi jaýapty mamandarǵa jolyǵýlaryna bolady. (Baılanys tel.: 8 708 905 66 85).
Bıylǵy jyldy mýftıat «Islam jáne dástúr qundylyǵy» jyly dep jarıalaýyna oraı, Ramazan aıyndaǵy is-sharalar salt-dástúrimizben sabaqtastyryp ótkiziletin bolady. Mysaly, oraza aıy áz Naýryz merekesine sáıkes kelgendikten aýyzashar kezinde meshit qonaqtaryna naýryz kóje, baýyrsaq tartý etilmek. Aýyzashar ótetin oryndardy qazaqı naqyshta bezendirip, ramazannyń kelgenin súıinshileý maqsatynda Jarapazan jyry aıtylady.
Qala turǵyndary men qonaqtary oraza kestesin meshitterden alýyna bolady. Sonymen qatar oraza kestesi men ramazanǵa qatysty aqparattardy «muftyat.kz» jáne «azan.kz» saıttarynan taba alady.
Call ortalyq
Orazaǵa, jalpy dinı máselege qatysty qandaı da suraqtar bolsa Qazaqstan musylmandary dinı basqarmasy janynan ashylǵan Dinı aqparat berý ortalyǵynan jaýap alýǵa bolatyndyǵyn habarlaımyz. Ortalyq nómiri – 8 (707) 233-30-30. WhatsApp: +7 (707) 662 6561. Sondaı-aq, Almaty ortalyq meshitine qarasty ortalyq nómeri – +7 707 939 7708.
Ramazan dáristeri
Bul aıda paıǵambarymyz (s.ǵ.s.) eki nársege qatty kóńil bólgen. Birinshisi – quran oqý bolsa, ekinshisi – qaıyrymdylyq jasaý. Sol sebepti, Almaty Ortalyq meshitinde aptasyna bes kún besin namazynan keıin orazaǵa qatysty taqyryptarda nasıhat aıtylyp, qala meshitterinde quran álippesi men namaz úıretý kýrstary júrgiziledi.
Sonymen qatar meshitterde kúndelikti taraýıh namazynyń aldynda eldi yntymaq pen birlikke shaqyratyn tanymdyq ýaǵyzdar men orazanyń hıkmetteri jóninde dárister júrgiziletin bolady. Odan bólek «30 kúnge 30 ýaǵyz» jáne «Ramazan jáne Ihsan» taqyryptarynda vıdeo ýaǵyzdar oqyrmandarǵa usynylmaq. «Baqytty januıa – dástúr jalǵaýshysy» taqyrybynda neke qıǵan jas-jubaılarǵa semınar ótkizý de josparǵa engizilip otyr. Nasıhat jumystaryna RANT pen JANT músheleri tartylatyn bolady.
Qaıyrymdylyq sharalary
Ramazan – qaıyrymdylyq aıy. Jaqsylyqtar eselenetin aı. Alla Elshisi (s.ǵ.s.) bir ósıetinde: «Sadaqanyń abzaly – Ramazan aıynda berilgen sadaqa», - dep súıinshileıdi. Almaty meshitterinde oraza aıynda «Sharapatty Ramazan», «Ramazan qorjyny», «Ramazan syıy», «Jomart juma» syndy aýqymdy qaıyrymdylyq is-sharalardy uıymdastyrý josparlanýda. Sonymen qatar «El úlesi páterge» jobasyn júzege asyrý da qolǵa alynbaq.
Raqym aıy – Ramazan qutty bolsyn! Qasıetti aıda ustaǵan orazamyz, jasaǵan duǵa-tilekterimiz, qulshylyq-ǵıbadattarymyz, árbir qaıyrly amaldarymyz qabyl bolǵaı! Alla Taǵala otbasymyzǵa amandyq, jumysymyzǵa bereke-birlik násip etkeı! Táýelsizdigimiz baıandy, elimiz aman, jurtymyz tynysh bolǵaı! Áýmın!