Almatyda Uly Otan soǵysyndaǵy Jeńistiń 80 jyldyǵyna oraı 28 gvardıashy-panfılovshylar atyndaǵy saıabaqta qala basshylyǵynyń, UOS ardagerleriniń jáne qoǵam ókilderiniń qatysýymen saltanatty is-sharalar ótti.
Máńgilik alaýǵa gúl shoqtaryn qoıǵannan keıin Almaty ákimi Erbolat Dosaev maıdangerler men olardyń jaqyndarymen birge 9 mamyr qarsańynda ashylǵan Uly Otan soǵysy ardagerleriniń aleıasyna bardy.
Munda estelik, uzaq ǵumyr men ómirsheńdikti bildiretin jóke aǵashtary otyrǵyzylyp, olardyń qasyna batyrlardyń qurmetine arnalyp esimi jazylǵan taqtaıshalar ornatyldy. Mundaı aleıalar Jeńistiń 80 jyldyǵyna arnalǵan ekologıalyq aksıa aıasynda qalanyń barlyq segiz aýdanynda bir mezgilde ashyldy.
Aleıany aralaý barysynda qala ákimi ardagerlermen emen-jarqyn áńgimelesip, beıbit ómir men urpaqqa syılaǵan tynyshtyq úshin shyn júrekten alǵys bildirdi. Erbolat Dosaev bul Aleıa qalanyń ajyramas bir bóligine aınalatynyn, bolashaq urpaq — balalar, nemere men shóbereler úshin ata-baba erligin eske salyp turatyn jandy eskertkish bolatynyn atap ótti. Ol ótkenniń dańqyn dáriptep, halyqtyń Jeńis úshin tókken qany men kóz jasyn umyttyrmaıtyn belgi bolmaq.
«Búgin sizdermen birge 28 gvardıashy-panfılovshylar atyndaǵy saıabaqta bolyp, eskertkishke gúl qoıý men úshin úlken mártebe. Bul eskertkish bizge jyl saıyn beıbit ómirdiń qadirin eske salady. Búgin biz ashyq aspan men tynyshtyqtyń qanshalyqty mańyzdy ekenin jaqsy túsinemiz — muny balalarymyzǵa, sizderdiń nemere-shóberelerińizge shyn júrekten tileımin. Qaladaǵy segiz aýdannyń bárinde ardagerlerge arnalǵan aleıalar ashyldy, biraq dál osy saıabaqta ornalasqanynyń orny erekshe. Biz urpaqtar arasyndaǵy baılanysty saqtaý úshin bul aleıany ómirsheń estelikke aınaldyrýǵa tyrystyq, – dedi Erbolat Dosaev.
Maıdangerler óz kezeginde Jeńistiń 80 jyldyǵyna arnalǵan is-sharalardy joǵary deńgeıde uıymdastyrǵany jáne Ardagerler aleıasyn ashqany úshin ákimge alǵys bildirdi.
«Kelesi 85 jyldyq mereıtoıǵa biz, soǵys ardagerleri, bolmaýymyz múmkin. Biraq bizdiń urpaǵymyz kelip, bul aǵashtardy atalary ekkenin eske alyp, taǵzym eter, – dedi UOS ardageri Qambar Ámiruly Sársenov.