«Batyrlarǵa taǵzym»: almatylyqtar qazaq batyrlarynyń qurmetine orasan alyp memlekettik týdy kóterip ótti
9 mamyrda Almatyda qala ákimdiginiń qoldaýymen ardagerler birlestikteri uıymdastyrǵan «Batyrlarǵa taǵzym» atty eske alý aksıasy ótti, dep habarlaıdy aqshamnews.kz
Shara Uly Jeńistiń 80 jyldyǵyn merekeleý aıasyndaǵy mańyzdy oqıǵa retinde qala turǵyndaryn biriktirip, soǵysqa qatysqan batyrlarymyzǵa, tyl eńbekkerlerine jáne Jeńiske ólsheýsiz úles qosqan barlyq erjúrek azamattarǵa qurmet bildirýge múmkindik berdi.
«Batyrlarǵa taǵzym» aksıasyna qatysýshylar sherýin áskerı úrmeli orkestr, Qurmet qaraýylynyń rotasy men ardagerler uıymdarynyń ókilderi bastap shyqty.
Ardagerlerdiń qoǵamdyq birlestikteri atynan aksıany uıymdastyrýshylardyń biri, Qazaqstan Respýblıkasy Generaldar keńesiniń tóraǵasy, general-leıtenant Sarsekov Beksultan Sarsekuly urpaqtar sabaqtastyǵynyń mańyzdylyǵyna erekshe toqtaldy:
«Bárimizge belgili, bıyl Uly Otan soǵysyndaǵy Jeńistiń 80 jyldyǵy atalyp ótýde. Bul soǵysta Qazaqstan zor úles qosty. Maıdanǵa bir mıllıon eki júz myńnan astam jaýyngerimiz – atalarymyz, ákelerimiz attandy. Olardyń tek 600 myńy ǵana elge oraldy».
«Búgingi urpaq úshin azattyq pen jeńis jolynda, búgingi jarqyn ári táýelsiz Qazaqstanda ómir súrýimiz úshin janyn qıǵan erlerdi umytpaý – qasıetti paryz. Biz bul azamattardy árdaıym jadymyzda saqtaýymyz kerek», – dedi ol.
Aksıa marshrýty Gogol kóshesiniń boıymen Ortalyq mádenıet jáne demalys parkinen bastap, 28 gvardıashy-panfılovshylar atyndaǵy saıabaqqa deıin jalǵasty. Shara Máńgilik alaý janyndaǵy Dańq memorıalyna gúl shoqtaryn qoıýmen aıaqtaldy. Bul sátte orkestrdiń súıemeldeýimen áskerı áýender oryndaldy. Aksıaǵa 30 myńnan astam almatylyq qatysty.
Aksıaǵa qatysýshylardyń biri, almatylyq turǵyn – Gaýhar Júsipova, maıdanger bolǵan atasynyń portretin ustap kelip, onyń erlikke toly ómiri men otbasy jadyndaǵy tarıhymen bólisti:
«Meniń atam Tlepov Kalel Tlepuly 1914 jyly Semeı oblysyndaǵy Chalobaı aýylynda dúnıege kelgen. Soǵys bastalǵanda ol 39-tank brıgadasy quramynda, motorly avtomatshylar batalónynyń 1-rotasynda avtomatshy bolyp qyzmet etti. Onyń áskerı joly Sevastopolden bastalyp, Volgograd pen Dnepr arqyly ótip, 1945 jyly Býdapeshtke deıin jetti. Kórsetken erligi úshin babam «Erligi úshin» medalimen marapattalǵan.
Biz – bala-shaǵasy, nemere-shóbereleri, atamyzdyń erligin maqtan tutamyz. «Batyrlarǵa taǵzym» aksıasyna qatysý arqyly onyń rýhyna, sondaı-aq beıbit ómir syılaǵan barlyq ardagerlerge qurmetimizdi bildiremiz».
Jeńimpazdar urpaǵyna degen maqtanysh pen birlik sezimin 80 jyldyq mereıtoılyq sımvolıkamen jáne ulttyq órnekpen bezendirilgen «Batyrlarǵa taǵzym!» degen jazýy bar 10 taqyryptyq banner aıryqsha ásermen tolyqtyrdy.
Kolonnalardy bezendirý barysynda 500 memlekettik tý qoldanylyp, qatysýshylarǵa 10 myń dana Qazaqstan týy men 20 myń «Jeńis lentasy» taratyldy. İs-sharany uıymdastyrýǵa 500 erikti jumyldyryldy. Jastardyń 14×7 metr kólemindegi alyp Memlekettik týdy kóterip ótýi aksıanyń jarqyn sátteriniń biri boldy.
Jeńis týraly estelik – bul tek tarıh qana emes, qazirgi men bolashaqqa arnalǵan adamgershilik baǵdar. «Batyrlarǵa taǵzym» aksıasy qazaqstandyq batyrlardyń erligi urpaq jadynda máńgi saqtalatynyn taǵy bir dáleldedi.