Almaty ákiminiń Alataý aýdany turǵyndarymen kezdesýinde qarıa shahar basshysynan shóberesiniń tusaýyn kesip berýdi ótindi.
Jıynda aýdan turǵyny Serik Qarmysbaev atty qarıa ákimnen shóberesiniń tusaýyn kesip berýine ótinish bildirdi, dep habarlaıdy Almaty-akshamy.kz QazAqparatqa silteme jasap.
«Aınalaıyn Erbolat balam! Meniń bir shóberem bar edi. Sonyń tusaýyn kesip berińdershi osy jerde. Bir aıtaıyn degenim. Kóp rahmet», - dedi aqsaqal.
Erbolat Dosaev qarıanyń sózin jerge tastamaı, ótinishin oryndap, búldirshinniń tusaýyn kesti. Keıin aqsaqal qazaqy dástúrmen balaǵa batasyn berdi.
«Tusaýyń kesildi qulama, Tizeńdi jaralap, jylama. Qulyndaı quldyrańdap júgirshi, Kánekı ózińdi syna da. Sekirseń quzdan súrinbe, Shyń quzǵa shyqqanda búgilme. Bolattaı qabyrǵań qataısyń, Ot, jalyn oınasyn túrinde. Alla taǵalam Baýyrjannyń batyrlyǵyn bersin, Abaıdyń aqyndyǵyn bersin, Kúláshtiń ánshiligin bersin, Tabanyń jerden taımasyn. Ózińdeı sıaqty Erbolat, Bir jerden shyǵatyn úlken azamat bolsyn! Allahý akbar», - dep batasyn berdi qarıa.
Eske salaıyq, keshe Almaty ákimi Erbolat Dosaev qalanyń Alataý aýdanynyń turǵyndarymen kezdesti.