Almaty ákimdigi qatty turmystyq qaldyqtardy jınaý jáne shyǵarý úshin ınfraqurylymdy sapaly jańǵyrtý jumystaryn belsendi túrde jalǵastyrýda.
2024-2025 jyldary qalada QTQ (qatty turmystyq qaldyqtar) jınaýǵa arnalǵan 2905 tereńdetilgen konteınerler ornatylady. Bul týraly Almaty ákimi Erbolat Dosaev Almaly aýdanynyń turǵyndarymen kezdesý barysynda málimdedi.
Ákimniń aıtýynsha, 2012 jyldan beri ornatylǵan barlyq konteınerler rekonstrýksıalanady. Sonymen qatar, 516 jańa tereńdetilgen konteıner alańy salynady, olardyń jartysy aǵymdaǵy jyldyń sońyna deıin ornatylady.
"Agressıvti ortanyń áserinen qoqys jáshikteriniń metaly tez eskiredi. 2025 jyldyń sońyna deıin barlyq tozǵan konteınerlerdi túgel aýystyramyz", - dedi Erbolat Dosaev.
Almatyda ótken jyldyń sońynda tereńdetilgen qoqys konteınerlerin ornatý jumystary bastaldy. Olardyń artyqshylyǵy - germetıkaly jáne buralqy ıtter men qustar olarǵa jete almaıdy. Sondaı-aq, tereńdetilgen konteınerler jaǵymsyz ıisti taratpaıdy ári estetıkaly.
"Halyqaralyq tájirıbege sáıkes, biz qapshyqty konteınerlerdi ornatýdy josparlap otyrmyz. Qyzmet kórsetý turǵysynan - qoqys konteınerlerin jýý, sanıtarlyq tazartýda shúberekten jasalǵan qapshyqty konteınerler áldeqaıda tıimdi. Sonymen qatar, bıyl biz 1800 eýrokonteınerdi aýystyramyz", - dep atap ótti ákim.
Bul sharalar Almaty qalasynyń ekologıalyq jaǵdaıyn jaqsartýǵa jáne qala turǵyndarynyń ómir súrý sapasyn arttyrýǵa baǵyttalǵan.