Bul týraly Almaty ákimi Erbolat Dosaev Áýezov aýdanynyń turǵyndarymen kezdesý barysynda aıtty.
Turǵynnyń suraǵy:
- Raıymbek dańǵylynda josparlanǵan BRT jobasyn qaıta qaraý múmkin emes pe? Ony Raıymbek dańǵylynda jasamańyz, munda bazarlar bar, oblystan adamdar keledi.
Almaty ákimi Erbolat Dosaevtyń jaýaby:
– Birinshiden Raıymbek dańǵylynyń qalalyq jol ekenin túsiný qajet, tıisinshe biz BRT jobasyn iske asyratyn bolamyz, óıtkeni qalany damytý qajet. Bizdiń basymdyǵymyz – qoǵamdyq kólik, búginde ol Raıymbekte tıimsiz.
Aıta ketý kerek, Raıymbek dańǵyly boıynsha BRT-nyń jalpy uzyndyǵy 17 km quraıdy, joba sonymen qatar "Altyn Orda" kólik-aýysyp otyrý torabyn (KAT) qurýdy qamtıdy.
Jobany iske asyrý kezinde qoǵamdyq kólikke bólingen jolaqtardyń uzyndyǵy dáliz uzyndyǵynan 70%-dan 90%-ǵa deıin ósedi, platformalary bar sol jaq jolaqta bólingen jolaqtar paıda bolady, al qoǵamdyq kóliktiń qozǵalys jyldamdyǵy 70%-ǵa ósedi. Osylaısha, dálizdiń búkil boıynda qoǵamdyq kóliktiń basymdyǵy qamtamasyz etiledi, qarbalas saǵattaǵy ortasha qozǵalys aralyǵy shamamen 5 mınýtty quraıdy.
Jobany 2 kezeńde iske asyrý josparlanýda.
- Birinshisi – aǵymdaǵy jyly Raıymbek dańǵylynyń Ahrımenko kóshesinen Pýshkın kóshesine deıingi ortalyq ýchaskesinde bólingen jolaqtar retteledi. Qurylys-montaj jumystary 2024 jyldyń ekinshi jartyjyldyǵyna josparlanǵan.
- Ekinshi kezeń batys bólikti qamtıdy – Ahrımenko kóshesinen bastap "Barlyq" bazaryna deıin, -2025-2026 jyldary iske asyrylady. Sondaı-aq, osy kezeńde Raıymbek dańǵylyn Pýshkın kóshesinen "Shyǵys" kólikke aýysyp otyrý torabyna deıin uzartý josparlanǵan.