Almatyda ortalyqtandyrylǵan káriz júıesimen qamtylmaǵan Almaly aýdanynyń 19 kóshesine ınjenerlik jeliler salynady
Almaty ákimi Erbolat Dosaev Almaly aýdanyna jumys sapary barysynda turǵyndarmen kezdesip, káriz jelileriniń qurylys barysymen tanysty, dep habarlaıdy aqshamnews.kz
Joba boıynsha Almaly aýdanynyń 19 kóshesinde jalpy uzyndyǵy 15 km bolatyn káriz jelilerin salý kózdelgen. Bıyl 6 kóshede 3 km jeliniń qurylysy aıaqtalady. Sonymen qatar, jeke sektor salyna bastaǵannan beri ortalyqtandyrylǵan káriz júıesi bolmaǵan Brýno kóshesinde qurylys jumystary aıaqtaldy.
2025 jyly qalǵan 13 kóshede jobany júzege asyrý jalǵasady.
Qabyldanǵan sharalardyń nátıjesinde 6800 tutynýshy ortalyqtandyrylǵan ınjenerlik jelilermen qamtamasyz etiledi.
«Turǵyndar atynan bizdiń ótinishterimizge nazar aýdaryp, atqarylǵan jumys úshin alǵys aıtamyn. Bizde ortalyqtandyrylǵan káriz júıesi paıda boldy, kóshe jaryǵy ornatyldy, jumystan keıin jol tolyq enimen asfálttaldy. Bul ózgeristerge óte rızamyz, endi bizde jaıly ári yńǵaıly boldy. Biz qýana-qýana serýenge shyǵamyz. Qoldaýlaryńyz ben qamqorlyqtaryńyz úshin rahmet», - dedi turǵyndardyń biri.
Aıta keteıik, 2024 jyldyń naýryzynda qala ákimi Erbolat Dosaevtyń bastamasymen Almatyda ınjenerlik komýnıkasıalardy kútip ustaýdyń jańa erejeleri qabyldandy. Qujatqa sáıkes, jer asty ınjenerlik jelilerdi tóseý kezinde jol jabynyn ashý jáne kóshelerdi qazý asfáltbeton jabyndysyn tolyqtaı – jıektastan jıektasqa deıin qalpyna keltirý mindettemesimen júrgizilýi kerek.
Qala basshysy Almaly aýdanynyń ákimine qurylys sapasy men jyldamdyǵyn baqylap, tutynýshylardy ortalyqtandyrylǵan komýnıkasıalarǵa ýaqytyly qosýdy tapsyrdy.
Eske sala keteıik, Almatyda ınjenerlik ınfraqurylymdy jańǵyrtý qarqyndy júrgizilýde. Bıylǵy 9 aıda 219 km jańa sýmen jabdyqtaý jáne sý burý jelileri salyndy, 27,3 km qoldanystaǵy jeliler jańartyldy. 2025 jyly taǵy 240 km jeli salý jáne 48 km jelini jańartý josparlanǵan.
Osylaısha, qabyldanǵan keshendi sharalardyń arqasynda 100 myńǵa jýyq qala turǵyny úshin ınjenerlik jelilerdiń tozýyna baılanysty jyldar boıy sheshilmegen sýmen jabdyqtaý jáne sý burý jelileri máselesi sheshiledi.