Búgin Premer-Mınıstrdiń orynbasary Eraly Toǵjanovtyń tóraǵalyǵymen memlekettik organdardyń basshylary men elimizdiń jetekshi ǵalymdarynyń qatysýymen bıologıalyq qaýipsizdik máseleleri jónindegi keńestiń otyrysy ótti.
Keńeste elimizdiń bıoqaýipsizdigin qamtamasyz etý máseleleri boıynsha Memleket basshysynyń Qazaqstan halqyna Joldaýynda qoıylǵan mindetter talqylandy, dep habarlaıdy Almaty-akshamy.kz
Sondaı-aq, «Nazarbaev Ýnıversıteti» DBBU, «Infeksıaǵa qarsy preparattar ǵylymı ortalyǵy» AQ, «Fıtohımıa» holdıńi, «D. V. Sokolskıı atyndaǵy otyn, katalız jáne elektrohımıa ınstıtýty» AQ, «Mıkrobıologıa jáne vırýsologıa ǵylymı-óndiristik ortalyǵy» JSHS jáne t.b. ortalyqtar júrgizip jatqan COVID-19-ǵa qarsy otandyq dárilik zattardy ázirleý máselesi talqylandy.
Keńes otyrysynyń qorytyndysy boıynsha Eraly Toǵjanov kelesideı birqatar tapsyrma berdi: epıdemıologıalyq syn-tegeýrinderge qarsy qaýipsizdikti qamtamasyz etý salasynda ǵylymı-zertteý jáne ınovasıalyq qyzmettiń tıimdiligin kúsheıtý jóninde usynystar ázirleý jónindegi jumys tobyn qurý; ǵylymı-zertteý jáne ınovasıalyq jumystardy iske asyrý jónindegi keshendi jospar ázirleý; epıdemıologıalyq qaýipsizdikti qamtamasyz etýge jáne ınfeksıalyq aýrýlarǵa qarsy dárilik preparattardyń jańa túrlerin ázirleýge baǵyttalǵan ǵylymı jáne ınovasıalyq jobalardy nysanaly qarjylandyrýdy qamtamasyz etý jóninde usynystar engizý; bıologıalyq qaýipsizdik salasyndaǵy otandyq ǵylymı ınstıtýttardyń ǵylymı-kadrlyq, materıaldyq-tehnıkalyq áleýetin damytý jónindegi naqty usynystardy taldaý jáne engizý.