Nysan 2026 jyldyń jeltoqsanynda paıdalanýǵa beriledi.
Eýropalyq qaıta qurý jáne damý banki Almaty JEO-2-ni jańǵyrtýǵa 130 mlrd teńge bóledi, dep habarlaıdy Almaty-akshamy.kz "Samuryq-Energo" AQ baspasóz qyzmetine silteme jasap.
"Almaty elektr stansalary" AQ men onyń ıesi jáne Eýropalyq qaıta qurý jáne damý banki (EQDB) arasynda "Almaty JEO-2-niń qorshaǵan ortaǵa áserin barynsha azaıtý arqyly jańǵyrtý" jobasyn qarjylandyrý týraly nesıelik kelisimge qol qoıyldy. Mámile somasy 130 mlrd teńgeni quraıdy", - dep jazylǵan habarlamada.
Sonymen qatar "Almaty elektr stansalaryna" qarjy bólý týraly taǵy bir kelisimge qol qoıyldy.
"Eski JEO-2 janyndaǵy ýchaskede jańa gaz stansasynyń qurylysy boıynsha jumys sındıkat, jetekshi halyqaralyq jáne qazaqstandyq bankter – EQDB, Azıa Damý Banki (ADB) jáne Qazaqstannyń Damý banki qarjylaryn tartý arqyly josparlanýda. Qarjy teńgemen beriledi", – dep jazylǵan habarlamada.
Joba "Samuryq-Qazyna" memlekettik qorynyń qoldaýymen júzege asyrylyp jatqany atap ótken jón. Ulttyq ál-aýqat qory óziniń korporatıvtik kepildigin beredi, bul sarapshylardyń pikirinshe, táýekelderdi azaıtýǵa jáne nesıe berý sharttaryn jaqsartýǵa kómektesedi, al kelisimniń ózi jobany uzaq merzimdi qarjymen qamtamasyz etedi.
Nesıelik kelisimge "AlES" AQ basqarma tóraǵasy Erlan Kirkimbaev pen EQDB Eýrazıa, Taıaý Shyǵys jáne Afrıka boıynsha Energetıka departamentiniń dırektory Aıda Sıtdıkova qol qoıdy.
"Almaty JEO-2-ni qorshaǵan ortaǵa tıgizetin áserin barynsha azaıtý arqyly jańǵyrtý" jobasy Almaty JEO-2 alańynda qýaty 600 MVt-qa deıingi gaztýrbınalyq tehnologıalardy qoldanatyn jańa stansa salýdy kózdeıdi.
Nysan 2026 jyldyń jeltoqsanynda paıdalanýǵa beriledi.