Premer-Mınıstr Oljas Bektenovtiń tóraǵalyǵymen Otandyq kásipkerler keńesiniń otyrysy ótti
Maqsaty – Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyndaǵy mindetterdi iske asyrý sheńberinde kásipkerlikti damytýdyń ózekti máselelerin talqylaý jáne ózara is-qımyl sharalaryn qarastyrý.
Oljas Bektenov memleket ınvestısıalyq tartymdylyqty arttyrý, ónerkásiptik áleýetti ashý, ınfraqurylymdyq máselelerdi sheshý jáne ekonomıkanyń naqty sektoryn damytý boıynsha aýqymdy jumystar atqaryp jatqanyn atap ótti. İri bıznes elimizdiń tehnologıalyq jáne ınovasıalyq damýynda mańyzdy ról atqara otyryp, shaǵyn jáne orta kásipkerlikti damytýǵa yqpal etýde.
Talqylaý barysynda energetıka, munaı-gaz sektory, metalýrgıa, aýyl sharýashylyǵy, kólik, qarjy, densaýlyq saqtaý, İT, týrızm salalarynyń ókilderi usynystaryn bildirdi. Metaldardy tereń óńdeý, munaı-gaz hımıasy jáne basqa da basym salalardaǵy jańa jobalarǵa basa nazar aýdaryldy. Otandyq taýar óndirýshilerdi qoldaý máseleleri de kóterildi.
Elishilik qundylyqty damytýǵa erekshe kóńil bólindi. Úkimet «Atameken» UKP-men birlesip, taýarlardaǵy, jumystar men qyzmetterdegi qazaqstandyq qamtý úlesin arttyrýǵa arnalǵan jańa ádisnamany ázirleýde. Oljas Bektenov bul tetiktiń ádil bolatynyn jáne otandyq kásiporyndarǵa serpin beretinin atap ótti.
Jasandy ıntellekt júıelerin keńeıtý jáne sıfrlyq tehnologıalardy damytý máseleleri de qaraldy. Týrızm, turǵyn úı-kommýnaldyq sharýashylyq, «jasyl» qarjylandyrý salasynda ekologıalyq taza, energıa únemdeıtin jáne tómen kómirtekti jobalardy iske asyrýdyń mańyzdylyǵy aıtyldy.
Bıznes ókilderi Memleket basshysynyń atom energetıkasyn damytý bastamasyn qoldaı otyryp, energıa tapshylyǵy jaǵdaıynda ónerkásip pen jańa nysandardy damytý úshin turaqty energıa kóziniń qajettiligin atap ótti. Eger 6 qazanda ótetin referendýmda atom elektr stansasyn salý boıynsha oń sheshim qabyldansa, bul eldegi óndiristerdiń energetıkalyq qajettilikterin jabýǵa jáne jańa jumys oryndaryn ashýǵa múmkindik beredi.