Tıisti zań Májiliste qaralyp jatyr.
Bul týraly Densaýlyq saqtaý mınıstri Ajar Ǵınıat habarlady. Mınıstr onyń vedomstvosy bul zańdy qoldaıtynyn aıtty, dep habarlaıdy Almaty-akshamy.kz.
Vedomstvo basshysynyń keltirgen derekterine saı, elimizde eresek turǵyndardyń 21%-y temeki tartady, balalardyń 20%-y artyq dene salmaǵynan, al 6%-y semizdikten zardap shegedi. 11-15 jastaǵy jasóspirimderdiń veıpterdi turaqty túrde shegýi - 10%-dy, energetıkalyq, tátti sýsyndardy ishýi -17,5%-dy quraıdy.
Mınıstr ataǵandaı, temekini tutynýdy azaıtý úshin 2023 jylǵy 1 qańtardan bastap temeki ónimderine aksızdiń stavkalary kóterildi.
«Tutynýdyń elektrondyq júıeleriniń (veıpter), olar úshin hosh ıistendirgishter men suıyqtyqtardyń aınalymyna tolyq tyıym salýdy engizý boıynsha Májiliste Zańǵa ózgerister qarastyryldy. 21 jasqa deıingi adamdarǵa energetıkalyq sýsyndardy satýǵa tyıym salýdy engizý jónindegi normany talqylaý rásimi júrgizilip jatyr», - dedi ol.
Energetıkalyq sýsyndardyń zıany jaıly sońǵy kezderi az aıtylyp júrgen joq. Osyndaı oqıǵalardyń biri osy aıdyń bas kezinde Almatyda bolǵan edi. Esterińizge sala keteıik, saıtymyzdyń 5 qyrkúıek kúngi shyǵarylymynda energetıkalyq sýsyn ishken jasóspirimniń aýrýhanaǵa aýyr halde jetkizilgenin habarlaǵan bolatynbyz.