Qazaqstanda energetıka salasyn keshendi jańǵyrtyp, onyń turaqty damýyn qamtamasyz etýge arnalǵan «Tarıfti ınvestısıaǵa aıyrbastaý» jańartylǵan baǵdarlamasy iske asyrylyp jatyr. Bul tetik energıamen jabdyqtaýdyń senimdiligin arttyrý úshin maqsatty ınvestısıa tartýǵa múmkindik beredi ári tutynýshyǵa túsetin júktemeni barynsha azaıtady, dep habarlaıdy aqshamnews.kz
2024 jyly baǵdarlama aıasynda edáýir qarajat jumyldyryp, eldegi elektr stansıalarynda jóndeý jáne qalpyna keltirý jumystaryn der kezinde oryndaýǵa qol jetkizildi. 2025 jyly ınvestısıa kólemi 428 mlrd teńgege deıin ulǵaıady dep kútilýde, bul aǵymdaǵy jylmen salystyrǵanda 13,24 %-ǵa joǵary.
Jańartylǵan tásildiń basty jańalyǵy – ınvestısıalardy qaıtarýdyń jyldyq lımıtin 32 mlrd-tan 428 mlrd teńgege deıin kóterý jáne elektr qýatyn qoldaýǵa arnalǵan qyzmettiń shekti tarıfin arttyrý. Bul jeke kapıtal tartýdy jáne aýqymdy tehnıkalyq qaıta jaraqtandyrýdy yntalandyrady.
«Tarıfty ınvestısıaǵa aıyrbastaý» baǵdarlamasy tarıftik ózgeristerdi energıa óndirýshi kompanıalardyń naqty mindettemelerimen – jóndeý qorlaryn ulǵaıtý, jabdyqtardy jańartý, óndiristik personaldyń eńbek jaǵdaıyn jaqsartýmen qatań baılanystyrýdy kózdeıdi. Eńbekaqyny kóterý, stansıalardy jańǵyrtý, jańa tehnologıalardy engizý – osynyń barlyǵy búkil energetıkalyq júıeniń senimdiligi men tıimdiligin arttyrýǵa yqpal etedi.
Sóıtip, baǵdarlama sheńberindegi tarıfti túzetý - shyǵyn ósýine jaı jaýap emes, zamanaýı, ornyqty ári keleshekke baǵyttalǵan energetıkany qalyptastyrýǵa jasalǵan oılastyrylǵan qadam. Uzaq merzimdi ınvestısıalyq kózqaras arqyly Qazaqstan energetıkalyq qaýipsizdigin nyǵaıtyp, 2060 jylǵa qaraı kómirtegi beıtaraptyǵyna jetýge eleýli úles qosady.
Tarıf qalyptastyrýdyń ashyqtyǵy men qarajatty paıdalaný týraly eseptilikke kelsek, energıa óndirýshi uıymdardyń derekteri endi ýákiletti organnyń aqparattyq júıesi arqyly usynylady.
Sondyqtan elektr energıasy boıynsha shekti tarıfti bekitý nemese túzetý jónindegi kelesi ótinimder de osy aqparattyq júıe arqyly berilip, tarıftúzý prosesteri tolyq sıfrlandyrylmaq.