Mundaı oıynshyqtar zorlyq-zombylyq pen agresıamen baılanysty oıyn sújetin týdyrady.
Eýrazıalyq ekonomıkalyq odaqqa kiretin memleketter balalardyń psıhıkalyq damýyna jaǵymsyz áser etetin oıynshyqtarǵa qoıylatyn talaptardy ázirleýge kelisti, dep habarlaıdy Almaty-akshamy.kz Qazaqstan Saýda jáne ıntegrasıa mınıstrligine silteme jasap.
Mamandar «Psıhologıalyq-pedagogıkalyq qaýipsizdik» talaptaryn ázirleýdi usyndy. Sebebi naryqta qorqynyshty, kúsh kórsetý belgileri bar, gıbrıdti jáne taǵy basqa balalardyń psıhıkalyq damýyna jaǵymsyz áser etetin oıynshyqtar kóbeıdi. Al psıhologtardyń aıtýynsha, ondaı qorqynyshty oıynshyqtar zorlyq-zombylyq pen agresıamen baılanysty oıyn sújetin týdyrady.
«Oıynshyqtarǵa arnalǵan qoldanystaǵy tehnıkalyq reglamentte tek materıaldarǵa, toksıkologıalyq-gıgıenalyq jáne mıkrobıologıalyq kórsetkishterge, fızıkalyq jáne mehanıkalyq, hımıalyq jáne elektrlik qasıetterge, radıasıalyq qaýipsizdikke qoıylatyn talaptar ǵana belgilengen. Osylaısha naryqtan qorqynyshty oıynshyqtardy alyp tastaý múmkin emes», - deıdi mamandar.
Máskeýde EEK keńesinde qazaqstandyq sarapshylar bul máseleni qarastyrý úshin oıynshyqtyń balaǵa keri áserin anyqtaıtyn ólshemderdi belgileıtin standarttar qajet ekenin jetkizdi.
«Balalardyń fızıkalyq jáne psıhıkalyq densaýlyǵyn qalyptastyrýdyń mańyzdylyǵy kúmán týdyrmaıdy. Qazaqstan 2015 jyly oıynshyqtarǵa psıhologıalyq-pedagogıkalyq saraptama júrgizý úshin tehnıkalyq reglamentke ózgerister engizýge bastamashy boldy. Ol kezde mundaı oıynshyqtardyń balanyń psıhıkasyna jaǵymsyz áser etý krıterıılerin aıqyndaý standartynyń bolmaýyna, ǵylymı zertteýler júrgizý qajettiligine baılanysty qujat qoldaý tappady», - dedi Densaýlyq saqtaý vıse-mınıstri Aıjan Esmaǵambetova.
Onyń aıtýynsha, oıynshyqtardyń balanyń psıhıkasyna keri áser etý krıterıılerin aıqyndaý standarty daıyn bolǵannan keıin qoldanystaǵy tehnıkalyq reglamentterdi ózgertý kerek.