Qazaqstan aýyl sharýashylyǵy ónimderiniń saýdasyn ulǵaıtpaq.
Qazaqstan Iran naryǵyna 250 mln dollardyń taýaryn jetkizýge daıyn, dep habarlaıdy Almaty-akshamy.kz Úkimet basshysynyń resmı saıtyna silteme jasap.
Qazaqstan Premer-Mınıstri Álıhan Smaıylov pen Irannyń aýyl sharýashylyǵy mınıstri Seıed Djavad Sadatı Nedjad agrarlyq jáne kólik-logıstıkalyq salalardaǵy yntymaqtastyqty keńeıtý perspektıvalaryn talqylady.
Premer-Mınıstr 2022 jylǵy qańtar-qarasha aılarynda eki el arasyndaǵy taýar aınalymy 20%-dan astamǵa ósip, $500 mln quraǵanyn atap ótti. Sonymen qatar ózara saýda kólemin odan ári ulǵaıtý maqsatynda Qazaqstan Iran naryǵyna jalpy quny shamamen $250 mln bolatyn qosymsha 75 taýar pozısıasyn jetkizýge daıyn.
«Aýyl sharýashylyǵy qazirgi tańda damý perspektıvasy óte joǵary sala bolyp otyr. Onyń ózara saýdadaǵy úlesi – shamamen 80%. Bizdiń elderimizde AÓK óniminiń taýar aınalymyn $1 mlrd-qa deıin arttyrýǵa múmkindik bar», - dedi Álıhan Smaıylov.
Jalpy, Úkimet basshysynyń aıtýynsha, Qazaqstan Úkimeti eki eldiń basshylary qoıǵan jalpy saýda kólemin $3 mlrd-qa deıin ulǵaıtý jónindegi mindetti oryndaý úshin belsendi jumys isteýge daıyn.
Sonymen qatar Álıhan Smaıylov ózara is-qımyldyń negizgi baǵyttarynyń biri kólik-logıstıka salasy ekenin atap ótti. Bul turǵyda «Soltústik-Ońtústik» kólik dálizi erekshe mańyzǵa ıe.
«Osy marshrýttyń ótkizý qabiletin ulǵaıtý boıynsha birlesken sharalar qabyldaý, atap aıtqanda, «Tar jerlerdi» joıý jónindegi jol kartasyn bekitip, ony iske asyrý jaqyn bolashaqta júk tasymaldaý kólemin edáýir ulǵaıtýǵa jol ashar edi», - dedi Álıhan Smaıylov.
Onyń aıtýynsha, Jol kartasyn iske asyrý 2025 jylǵa qaraı dálizdiń ótkizý qabiletin jylyna 10 mln tonnaǵa deıin arttyrýǵa múmkindik bermek.
Al Seıed Djavad Sadatı Nejad Qazaqstan-Iran úkimetaralyq komısıasynyń 18-shi otyrysy tabysty ótkenin aıtty, onyń qorytyndysy boıynsha taraptar kóptegen ózara tıimdi kelisimge keldi.
Sonymen qatar Irannyń Aýyl sharýashylyǵy mınıstri saýda jáne júk tasymaldaý kólemin ulǵaıtý úshin temirjol jelisi men teńiz ınfraqurylymyn odan ári damytýdyń mańyzy zor ekenin atap ótti, sondaı-aq Iran Qazaqstan naryǵyna sıtrýs ónimderin jetkizý kólemin keńeıtýge daıyn ekenin málimdedi.