Qazaqstanda endi turǵyn úıdi onlaın satýǵa jáne satyp alýǵa bolady, dep habarlaıdy almaty-akshamy.kz.
Ádilet mınıstrligi Freedom bankpen birlesip jyljymaıtyn múlikti onlaın qaıta tirkeý boıynsha pılottyq jobany iske qosty. Turǵyn úıdiń ornalasqan jerine qaramastan memlekettik tirkeýge qujattardy tapsyrý múmkindigi paıda boldy.
«Endi qazaqstandyqtar turǵyn úıdi Halyqqa qyzmet kórsetý ortalyǵyna jáne notarıýsqa barmastan onlaın rejımde satyp alyp, sata alady. Mámileniń jaýaby ótinim bergen sátten bastap 8 saǵattan aspaı keledi, al tirkeý nebári 10 mınýtty quraıdy», - dep túsindirdi Ádilet mınıstrliginiń resmı ókili Talǵat Ýálı jýrnalıserge arnalǵan brıfıńte.
Mámile prosesi bıometrıalyq aýtentıfıkasıa arqyly satýshy men satyp alýshynyń jeke basyn beıne sáıkestendirýden bastalady. Eger satýshy nekede bolsa, onda jubaıy da osy prosedýradan ótýi kerek. Ári qaraı mámilege qatysýshylar notarıýspen beıneqońyraý arqyly baılanysyp, notarıýs satýshy men satyp alýshynyń arasyndaǵy kelisimniń túpnusqalyǵyna kóz jetkizedi. Satyp alý-satý shartyna elektrondyq-sıfrlyq qoltańba arqyly qol qoıylady.
Internettegi kez-kelgen satyp alý-satý mámilesin árqashan satyp alýshy bastaıdy. Iaǵnı ol ótinim jiberedi, al satýshy ony rastaıdy.
Talǵat Ýálıdiń aıtýynsha, úıdi onlaın satý nemese satyp alý úshin Freedom banktiń klıenti bolý shart emes. Muny kez kelgen adam jasaı alady. Eń bastysy – Qazaqstan azamaty bolý jáne elektrondyq-sıfrlyq qoltańbasy bolýy kerek.
Sondaı-aq, jyljymaıtyn múlikke quqyqtar 2015 jyldan bastap elektrondyq formatta resimdelýge tıis.
Aıta keteri, alǵashqy kezeńde satyp alynatyn turǵyn úıdiń qunyna shekteý qoıylǵan. Iaǵnı onlaın operasıany quny 50 mln teńgeden aspaıtyn páterdi satyp alǵan nemese satqan azamattar júzege asyrady. Qazir joba Astana men Almaty qalalarynda júrip jatyr. Eger pılottyq joba sátti bolsa, Qazaqstannyń basqa da óńirlerin qosý jáne turǵyn úıdiń qunyn ulǵaıtý josparlanyp otyr.