Jalaqysy boıynsha sýbsıdıalar mólsheri ulǵaıtylady.
Keler jyldan bastap «Kúmis jas» jobasyna qatysýshylardyń kontıngenti men qatysý kezeńi keńeıtiletin bolady, dep habarlaıdy Almaty-akshamy.kz.
«2023 jylǵy 1 qańtardan bastap zeınetkerlik jasqa deıingi azamattardy jumyspen qamtýǵa járdemdesýdiń belsendi sharalaryna tartýǵa baǵyttalǵan «Kúmis jas» jobasyna qatysýshylardyń kontıngenti men qatysý kezeńi keńeıtiletin bolady. Oǵan 50 jasqa tolǵan qazaqstandyqtar 3 jylǵa deıin qatysa alady», - delingen Eńbekmıni baspasóz qyzmetiniń habarlamasynda.
Qoldanystaǵy qaǵıdalarǵa sáıkes, joǵaryda kórsetilgen jobany iske asyrý sheńberinde jumys berýshiler memleketten belgilengen jalaqy mólsheriniń 50%-yna sýbsıdıa (biraq 30 aılyq eseptik kórsetkishten (budan ári – AEK) kóp emes) ala otyryp, zeınetkerlik jasqa deıingi (58 jastan bastap) adamdardy jumysqa ornalastyrý úshin jumys oryndaryn qurady. Bul rette jumystyń uzaqtyǵy 12 aıdan aspaıdy.
2023 jyldan bastap «Kúmis jas» jobasyna qatysýshylar kontıngentine 50 jastan asqan jumyssyz azamattar engiziledi, qatysý merzimi 36 aıǵa deıin, sondaı-aq qatysýshylardyń jalaqysy boıynsha sýbsıdıalar mólsheri ulǵaıtylady.
Sýbsıdıalar mólsheri: jumystyń birinshi jylynda jalaqy mólsheriniń 70%-yn (biraq 30 AEK-ten aspaıtyn), jumystyń ekinshi jylynda jalaqy mólsheriniń 65%-yn (biraq 30 AEK-ten aspaıtyn), jumystyń úshinshi jylynda jalaqy mólsheriniń 60%-yn (biraq 30 AEK-ten aspaıtyn) quraıdy.
Sonymen qatar joba aıasynda «jeke kómekshi» jáne «áleýmettik qyzmetker» kásipteri boıynsha jumys ornyn alý múmkindigi paıda bolady.
«Kúmis jas» jobasyn iske asyrý sheńberinde jumyspen qamtýǵa járdemdesý sharalarymen jyl saıyn keminde 15 myń adamdy qamtý josparlanýda.