Bul týraly Konstıtýsıalyq keńestiń tóraǵasy Qaırat Mámı aıtty.
Kelesi jyldan bastap jeke adamdar Konstıtýsıalyq sotqa tikeleı shaǵymdana alady, dep habarlaıdy Almaty-akshamy.kz
Mámı 5 maýsymda ótken referendým elimiz úshin aıryqsha máni bar tarıhı oqıǵa bolǵanyn atap ótti. Aıtýynsha, konstıtýsıalyq reforma búkil quqyq salasyn jańǵyrtýǵa jol ashty.
«Jeke adamnyń quqyǵyn qorǵaý ári qaraı kúsheıtildi. Osy reforma aıasynda Konstıtýsıalyq keńes ornyna Konstıtýsıalyq sot qurylatyn boldy. Kelesi jyldan bastap jeke adamdar Konstıtýsıalyq sotqa tikeleı shaǵymdana alady», - dedi ol.
Sondaı-aq, reforma aıasynda Prezıdenttiń tikeleı usynysymen Konstıtýsıalyq sotqa júginý sýbektilerine Bas prokýror jáne Adam quqyqtary jónindegi ýákil qosyldy.
«Joǵaryda atalǵan ózgerister elimizde adam quqyqtary men bostandyqtaryn tıimdi qorǵaý júıesin ári qaraı tereńdetýge jol ashty. Konstıtýsıalyq reforma aıasynda bolǵan jańalyqtar halyqaralyq tájirıbege sáıkes keledi. Atalǵan ózgerister jeke adamnyń Konstıtýsıalyq baqylaýǵa qol jetkizýin keńeıtýdi qoldaıdy», - dedi Konstıtýsıalyq keńes tóraǵasy.
Aıtýynsha, qazir «Konstıtýsıalyq sot týraly» Konstıtýsıalyq zań ázirlenip jatyr.