Qazaqstanda turǵylyqty jeri boıynsha tirkeýdiń jańa túri paıda boldy
Elimizde azamattardy turǵylyqty jeri boıynsha tirkeýde jańa pılottyq joba iske qosyldy. Bul týraly QR İshki ister mınıstrliginiń ókili Shuǵyla Turlybek málim etti, dep habarlaıdy Almaty-akshamy.kz QazAqparatqa silteme jasap.
«Memleket basshysynyń tapsyrmasyna sáıkes, polısıa qyzmetin sıfrlandyrý sheńberinde bıyl sáýirden bastap «Halyk Homebank» mobıldi qosymshasy arqyly azamattardy turǵylyqty jeri boıynsha tirkeýdiń pılottyq jobasy iske qosyldy. Bul jańashyldyq qazaqstandyqtarǵa 5 mınýttyń ishinde turǵylyqty jeri jáne ýaqytsha turatyn jeri boıynsha tirkelýge múmkindik beredi», - dedi Shuǵyla Turlybek mınıstrlikte onlaın ótken baspasóz máslıhatynda.
Sondaı-aq, İİM ókili atalǵan jańashyldyqty qoldanýdyń jolyn aıtyp berdi. «Smartfonyńyzǵa «Halyk Homebank» mobıldi qosymshasyn júktep, «Memlekettik qyzmetter» bóliminde – «Halyqty turǵylyqty jeri boıynsha tirkeý» tarmaǵyn tańdap, tirkeý túrine, tirkeý merzimine, qyzmet alýshynyń mártebesine baılanysty joldardy toltyrý jetkilikti. Jalpy, bizdiń mınıstrlik usynatyn memlekettik qyzmetterdi sıfrlandyrý jáne avtomattandyrý jumysy jalǵasyn tabýda», - deıdi ol.
Onyń aıtýynsha, búginde ishki ister mınıstrligi usynatyn 40 memlekettik qyzmettiń 38-i avtomattandyrylǵan.