QR Eńbek jáne halyqty áleýmettik qorǵaý mınıstrligi QR Úkimetiniń atyna jiberilgen qadaǵalaý aktisinde kórsetilgen QR Bas prokýratýrasynyń eskertýlerin eskere otyryp, azamattardy eńbek kúshi artyq óńirlerden eńbek kúshi tapshy óńirlerge erikti túrde kóshirý máselelerin retteý salasyndaǵy qoldanystaǵy NQA-ǵa túzetýlerdiń úshinshi paketin ázirledi, dep habarlaıdy aqshamnews.kz.
Jumys kúshiniń mobıldiligin arttyrý úshin azamattardy erikti túrde qonys aýdarý jónindegi sharalardyń iske asyrylýyn tekserý qorytyndylary boıynsha Bas prokýratýra qonys aýdarýǵa qatysýshylar men eńbek mobıldiligi ortalyǵy arasyndaǵy sharttyq mindettemelerdiń negizderin, júrgizý tártibin, nysanyn jáne oryndalýyn monıtorıńileý bóliginde qoldanystaǵy qaǵıdalarǵa ózgerister engizý qajettigin atap ótti.
Osy jyldyń tamyz aıynda Eńbekmıni quqyqtyń sybaılas jemqorlyq normalaryn anyqtaý jáne normatıvtik quqyqtyq aktilerdi jetildirý boıynsha usynystar ázirleý maqsatynda quqyqtyq monıtorıń júrgizildi.
Anyqtalǵan problemalyq máseleler men qadaǵalaý organynyń usynymdaryn eskere otyryp, eńbek mobıldiligin arttyrý úshin erikti qonys aýdarý erejelerine túzetýlerdiń úshinshi paketi daıyndaldy.
Atap aıtqanda, mynadaı ózgerister kózdeledi:
1) mansap ortalyqtar qyzmetkerleriniń qonys aýdarýshy nemese qandas usynǵan qujattardy, ekonomıkalyq mobıldiligi sertıfıkaty boıynsha aqshalaı tólemdi paıdalana otyryp satyp alynatyn jyljymaıtyn múlik obektisi boıynsha olardyń tolyqtyǵy men durystyǵy turǵysynan málimetterdi mámile obektisine tolyq jáne muqıat qaraý úshin oǵan shyǵý jolymen salystyryp tekserýdi júzege asyrýy;
2) satyp alynatyn jyljymaıtyn múliktiń qunyn baǵalaý nátıjelerine shaǵymdaný boıynsha eńbek mobıldiligi ortalyqtarynyń quqyǵyn keńeıtý;
3) qonys aýdarýshynyń nemese qandastyń budan buryn ekonomıkalyq mobıldilik sertıfıkaty arqyly satyp alynǵan turǵyn úıdi satyp alý nıeti bolǵan jaǵdaıda ekonomıkalyq mobıldilik sertıfıkatyn berýden bas tartý boıynsha qosymsha negizdi bekitý;
4) qonys aýdarýshylardyń qonystaný aýmaǵynan tys jerlerde eńbek qyzmetin júzege asyrý quqyǵyn alyp tastaý.
Sonymen qatar qandastar men qonys aýdarýshylardy qabyldaýdyń óńirlik kvotasyna engizý jáne erikti qonys aýdarýdy memlekettik qoldaý sharalaryn kórsetý jónindegi memlekettik kórsetiletin qyzmetterdi 2025 jylǵy naýryzdan bastap avtomattandyrý josparlanyp otyrǵanyn habarlaımyz. Osylaısha, kórsetiletin qyzmetti alýshylardyń mansaptyq ortalyqtardyń qyzmetkerlerimen baılanysy joıylady, bul sybaılas jemqorlyq táýekelderin barynsha azaıtýǵa múmkindik beredi.
Osy memlekettik qyzmet túrlerin sıfrlandyrý qonys aýdarýǵa qatysýshylar men eńbek mobıldiligi ortalyqtary arasyndaǵy sharttyq mindettemelerdiń oryndalýyna naqty monıtorıńti qamtamasyz etedi.
Esterińizge sala keteıik, 2023 jyldyń 1 shildesinen bastap Úkimet aıqyndaǵan qonystandyrý óńirleriniń tartymdylyǵyn arttyrý maqsatynda jańa oryndaǵy turǵyn úı qunynyń 50% - na deıingi mólsherinde ekonomıkalyq mobıldilik sertıfıkattary boıynsha aqshalaı tólemder júzege asyryla bastady.
Sol jyldyń qyrkúıeginde Eńbekmıni berilgen 486 ekonomıkalyq mobıldilik sertıfıkattary boıynsha keshendi taldaý júrgizdi, onyń barysynda qonystandyrý óńirlerinde joǵarlatylǵan baǵamen turǵyn úı satyp alý faktileri anyqtaldy. Tıisti sharalardy qabyldaý úshin jergilikti atqarýshy organdarǵa jáne QR Qarjy monıtorıńi agenttigine hattar joldandy.
QR Bas prokýratýrasynyń derekteri boıynsha, qadaǵalaý organy júrgizgen tekserýler barysynda jalǵan qujattardy paıdalana otyryp, azamattardy jalǵan kóshirýin resimdeý jolymen 1 mlrd teńgeden astam qarjyny maqsatsyz paıdalaný jáne urlaý faktileri anyqtaldy.
Prokýrorlar sotqa deıingi 20 tergeýdi bastady. Tergeý barlyq qatysýshy tulǵalardy anyqtaý, olardy jaýapqa tartý, sondaı-aq keltirilgen zalaldy óteý boıynsha sharalar qabyldaıdy.
Normatıvtik aktilerdegi olqylyqtardy joıý jáne erikti qonys aýdarýdy qoldaý jónindegi memlekettik sharalardyń iske asyrylý barysyn baqylaý júıesin kúsheıtý úshin Bas prokýratýra QR Úkimetine qadaǵalaý aktisin engizdi.