Qazaqstanda barlyq salany sıfrlandyrý qarqyn alýda
Birinshi kezekte áleýmettik-eńbek salasyn sıfrlandyrý bastalmaq.
QR Eńbek jáne halyqty áleýmettik qorǵaý mınıstri Serik Shápkenov jáne QR Sıfrlyq damý, ınovasıalar jáne aeroǵarysh ónerkásibi mınıstri (SDIAÓM) Baǵdat Mýsın áleýmettik-eńbek salasyn sıfrlandyrý boıynsha jumys keńesin ótkizdi, onyń barysynda atqarylǵan jumystar men aǵymdaǵy jylǵa arnalǵan mindetter, sondaı-aq sıfrlandyrylǵan memlekettik qyzmetterdiń reınjınırıngi máseleleri talqylandy, dep habarlady Almaty-akshamy.kz. QR Eńbek jáne halyqty áleýmettik qorǵaý mınıstrliginiń taratqan habaryna silteme jasap.
Vedomstvo basshylarynan basqa keńeske Eńbekmıni men SDIAÓM vıse-mınıstrleri jáne departament dırektorlary, Eńbek, áleýmettik qorǵaý jáne kóshi-qon komıtetiniń, «Azamattarǵa arnalǵan úkimet» memlekettik korporasıasy» KEAQ, «ERDO» AQ, «Zerde» UIH» AQ jáne «UAT» AQ ókilderi qatysty.
Serik Shápkenov áleýmettik-eńbek salasynda kórsetiletin 45 qyzmettiń 41-i (91%) elektrondyq túrde kórsetiletinin, onyń 18-i proaktıvti, ıaǵnı azamattyń qatysýynsyz avtomatty túrde kórsetiletinin habarlady. Sondaı-aq, mınıstr Elektrondyq eńbek bırjasy, sıfrlyq jumyspen qamtý ortalyqtary, Eńbek sharttaryn esepke alýdyń biryńǵaı júıesi, Áleýmettik qyzmetter portaly jáne t.b. sıaqty Eńbekmıni iske asyryp jatqan jobalar týraly aıtyp berdi.
SDIAÓM ókilderi 1 shildeden bastap «1411» baılanys ortalyǵy «1414» biryńǵaı baılanys ortalyǵynyń platformasyna aýystyrylatynyn habarlady. Aldaǵy ýaqytta 2 jáne 3-toqsandardyń qorytyndysy boıynsha baılanys ortalyǵynyń qyzmetine birlesken baǵalaý júrgiziletin bolady.
Óz kezeginde QR Eńbek jáne halyqty áleýmettik qorǵaý vıse-mınıstri Erbol Ospanov Áleýmettik qyzmetter portalyn paıdalanýshylardyń belsendiliginiń artýyna baılanysty 1 tamyzdan bastap «ERDO» AQ bazasynda Áleýmettik qyzmetter portaly máseleleri boıynsha baılanys ortalyǵyn iske qosý josparlanyp otyrǵanyn habarlady.
«Azamattarǵa arnalǵan úkimet» memlekettik korporasıasy» KEAQ 1414 baılanys ortalyǵynan Áleýmettik qyzmetter portaly máseleleri boıynsha qońyraýlardy avtomatty túrde baǵyttaýdy júrgizedi», – dedi ol.
Erbol Ospanov sondaı-aq Memleket basshysynyń zeınetaqy men járdemaqy taǵaıyndaýǵa baılanysty prosesterdi tolyq sıfrlandyrý týraly tapsyrmasynyń oryndalý barysy týraly habarlady.
«Negizgi mindet – qyzmet kórsetýdiń bastamashysy azamat emes, memleket bolýy úshin osy qyzmetti múmkindiginshe proaktıvti formatqa kóshirý. Ol úshin memlekettik organdardyń aqparattyq júıelerinde azamat týraly aqparattyń bolýy qajet. Búgingi tańda zeınetaqy tólemderin taǵaıyndaý prosesi azamattyń Memlekettik korporasıaǵa jeke baryp ótinish berýi talap etilmetindeı etip sıfrlandyryldy. Qujattardyń sáıkestigin odan ári qaraý, elektrondyq zeınetaqy isterin qalyptastyrý Eńbekmıniniń aqparattyq júıelerinde júrgiziledi», – dep bólisti vıse-mınıstr.
Onyń aıtýynsha, bul baǵyttaǵy jumys jalǵasýda, azamat týraly aqparatty memlekettik organdardyń aqparattyq júıelerine tolyq aýdarýdyń múmkin bolatyn nusqalaryn esepteý júrgizilýde.
Eńbekmıni sondaı-aq zeınetaqy tólemderi men járdemaqylardy ákimshilendirý jónindegi shyǵystardy ońtaılandyrý boıynsha jumys isteýde. Qazirgi ýaqytta árbir járdemaqy nemese zeınetaqy tólemi ekinshi deńgeıdegi bankterge jáne «Qazposhta» AQ-ǵa jeke element retinde túsedi, olardyń árqaısysy úshin komısıalyq alym tólenedi. Bul sheshim komısıalyq alym tólemderinen jyl saıyn shamamen 4,5 mlrd teńgeni únemdeýge múmkindik beredi.
Sonymen qatar, keńes barysynda taraptar «bala týýǵa baılanysty jáne bir jasqa deıingi bala kútimi boıynsha járdemaqylar taǵaıyndaý» proaktıvti memlekettik qyzmetin ońtaılandyrýdy talqylady. Osylaısha, kórsetiletin qyzmetti alýshymen dıalog kezinde SMS sanynyń ekiden birge deıin qysqarýynyń arqasynda 1 maýsymnan bastap proaktıvti túrde sátti kórsetilgen qyzmetter sany 10%-dan 37%-ǵa deıin ósti. Jyl sońyna deıin bul kórsetkishti 50%-ǵa deıin jetkizý josparlanyp otyr.
Jyl sońyna deıin taǵy kelesideı birqatar proaktıvti qyzmetterdi ońtaılandyrý josparlanýda:
– jumysynan aıyrylǵan jaǵdaıda tólenetin áleýmettik tólemdi taǵaıyndaý;
– asyraýshysynan aıyrylǵan jaǵdaıda tólenetin áleýmettik tólemdi taǵaıyndaý;
– asyraýshysynan aıyrylý boıynsha memlekettik áleýmettik járdemaqyny taǵaıyndaý;
– eńbek etý qabiletinen aıyrylǵan jaǵdaıda beriletin áleýmettik tólemdi taǵaıyndaý;
– múgedektigi boıynsha memlekettik áleýmettik járdemaqy taǵaıyndaý;
– «Altyn alqa», «Kúmis alqa» alqalarymen marapattalǵan nemese buryn «Batyr Ana» ataǵyn alǵan, «Ana dańqy» ordenderimen marapattalǵan kópbalaly analarǵa memlekettik járdemaqy taǵaıyndaý.
Keńes qorytyndysy boıynsha taraptar áleýmettik-eńbek salasyn sıfrlandyrý boıynsha belsendi yntymaqtastyqty jalǵastyrýǵa kelisti.