Sý resýrstary jáne ırrıgasıa mınıstrligi sý salasy qyzmetkerlerin áleýmettik qoldaý sharalaryn ázirledi
Sý resýrstary jáne ırrıgasıa mınıstrligi sý salasynda jumys isteıtin mamandarǵa áleýmettik qoldaý kórsetý úshin birqatar is-sharalar ázirledi. Atap aıtqanda, mınıstrlik «Tabıǵı monopolıalar týraly» zańǵa ózgerister engizýdi usyndy. Bul ózgerister sý salasy qyzmetkerleriniń eńbekaqysyn elektr jáne jylý salasynda isteıtin mamandardyń jalaqysymen teńestirýge baǵyttalǵan.
Qazirgi ýaqytta zań jobasy Senattyń qaraýyna jiberildi. Túzetýler qabyldanǵan jaǵdaıda, ol 2025 jyldyń ekinshi jartysynda sý salasy qyzmetkerleriniń jalaqysyn 50%-ǵa deıin ósirýge múmkindik beredi. Bul salada kadr tapshylyǵyn azaıtyp, bilikti mamandardy tartýǵa kómektesedi.
Memleket basshysy jarıalaǵan «Jumysshy mamandyqtar jyly» aıasynda Sý resýrstary jáne ırrıgasıa mınıstrligi salalyq jospar ázirledi. Onda jańa jumys oryndaryn ashý, kásibı standarttardy daıyndaý jáne mamandardyń biliktiligin arttyrý jumystary qamtylǵan. Mundaı is-sharalardy jyl saıyn ótkizý josparlanyp otyr.
Qytaı, Fransıa, Izraıl, Nıderland jáne AQSH sıaqty eldermen qazaqstandyq kadrlardy qaıta daıarlaý boıynsha kelisimder jasaldy. Qazirdiń ózinde ondaǵan maman shetelde oqyp keldi. Bul rette barlyq shyǵyndy qabyldaýshy taraptar ótedi.
Sondaı-aq «Jumysshy mamandyqtar jyly» aıasynda «Otbasy bank» sý sharýashylyǵy salasy mamandaryna jeńildetilgen sharttarmen turǵyn úı satyp alýǵa múmkindik beretin ıpotekalyq baǵdarlamany iske qosty.
«Dıplommen aýylǵa» baǵdarlamasyna «Gıdrotehnık-ınjener», «Sý resýrstary jáne sý paıdalaný», «Melıorasıa, rekýltıvasıa jáne jerdi qorǵaý» mamandyqtary qosyldy. Aýylǵa qonys aýdarǵan sý mamandaryna beriletin búdjettik nesıe kólemi 7,8 mln teńgege deıin ulǵaıtyldy.
Sonymen birge «QR Memlekettik nagradalar týraly» zańyna tolyqtyrýlar engizildi. Sý sharýashylyǵy salasynyń damýyna eleýli úles qosqan mamandarǵa «Qazaqstannyń sý sharýashylyǵy salasynyń eńbek sińirgen qaıratkeri» ataǵy beriledi.
«Qazaqstannyń sý sharýashylyǵy salasynda 10 myńǵa jýyq adam eńbek etedi. Olarǵa qolaıly eńbek jaǵdaıyn jasap, laıyqty jalaqymen qamtamasyz etý biz úshin mańyzdy. Sý sharýashylyǵy salasy mamandaryn áleýmettik qoldaý, sondaı-aq olardy qaıta daıarlaý ınfraqurylymdy damytý men normatıvtik quqyqtyq bazany jetildirýden kem emes. Byltyr 7 myńnan astam adamnyń jalaqysy orta eseppen 25%-ǵa ósti. Sý sharýashylyǵy mamandyǵynyń bedelin arttyrý úshin mınıstrlik bul baǵyttaǵy jumysty jalǵastyra beredi», – dedi Sý resýrstary jáne ırrıgasıa mınıstri Nurjan Nurjigitov.