Almaty qalasynyń bilim basqarmasyna qarasty «Úmit úıi» komýnaldyq memlekettik mekemesinde Memleket basshysy Qasym-Jomart Toqaevtyń «Ádiletti memleket. Birtutas ult. Berekeli qoǵam» atty jańa Joldaýy talqylandy.
Amanat partıasynyń bastamasymen «Úmit úıi» komýnaldyq memlekettik mekemesinde el Prezıdentiniń 1 qyrkúıek kúni jarıalaǵan Qazaqstan halqyna Joldaýy talqylanyp, eńbek ujymyna onyń negizi baǵyttary túsindirildi. Aıtylǵan jıynda Pedıatrıa jáne balalar hırýrgıasy ǵylymı ortalyǵynyń dırektorlar keńesiniń tóraǵasy, medısına ǵylymynyń doktory Marıa Omarova spıker retinde aqparattyq-nasıhattyq jumystar júrgizdi.
«Mine, bir aıdan astam ýaqyt Prezıdent Joldaýyn talqylap jatyrmyz. Sebebi, árbir Joldaý bul – siz ben bizdiń keleshektegi maqsatymyz ben mindetimiz. Qyrkúıektiń birinshi juldyzynda jarıalanǵan jańa Úndeý «Ádiletti memleket. Birtutas ult. Berekeli qoǵam» ataýymen shyqty. Onda densaýlyq saqtaý salasyna úlken kóńil bólindi. Árıne, densaýlyq saqtaý salasy bolsyn, ǵylym salasy bolsyn, mádenıet salasy bolsyn, óte ózekti máseleler kóp. Biraq onyń ishinde Prezıdentimizdiń medısına problemalaryna nazar aýdaryp, óz sózinde naqty sheshimder aıtqany kóńil qýantady. Ásirese, aýyldardaǵy densaýlyq saqtaý salasyna mán berildi. Naqty aıtqanda, emdeý mekemesi joq 650 eldi mekende aldaǵy eki jylda medısınalyq jáne feldsherlik-akýsherlik bólimsheler salynyp, qajetti qural-jabdyqpen tolyq qamtamasyz etiletini aıtyldy. Osylaısha, memleket bir mıllıonnan astam adamnyń alǵashqy medısınalyq-sanıtarlyq kómek alýyna múmkindik jasaıdy. Sonymen qatar, ulttyq joba aıasynda 32 aýdandyq aýrýhana zamanǵa saı jańaryp, aýdanaralyq kópbeıindi mekemege aınalmaq. Onda ınsýltten emdeý ortalyqtary, hırýrgıa, jansaqtaý jáne ońaltý bólimderi ashylady. Sonyń arqasynda tórt mıllıonnan astam adamǵa kórsetiletin medısınalyq qyzmettiń sapasyn arttyrý kózdelip otyr», – dedi Marıa Omarova.
Sondaı-aq, M.Omarova Joldaý barysynda aıtylǵan ózge de mańyzdy máselelerge toqtaldy.
«Memleket basshysy qyrkúıek aıyndaǵy Joldaýynda sapaly dárigerlerdi daıyndaý máselesine de asa mán berdi. Bilim berý salasynda san emes, sapa basty orynda ekenin aıtty. Oǵan qosa, rezıdentýranyń memlekettik grant kólemin 70 paıyzǵa kóbeıtý kerektigin habarlady. Ózderińiz de bilesizder ǵoı, sapaly dárigerler jetispeıdi. Sondyqtan bul - Qazaqstan medısınasyn damytýdaǵy óte tıimdi qadam», – dedi ol.
Aıta ketken jón, Almaty qalasy bilim basqarmasynyń «Úmit úıi» komýnaldyq memlekettik mekemesi tárbıe men bilim berý fýnksıalaryn júzege asyrý úshin uıymdyq-quqyqtyq túrde qurylǵan, zańdy tulǵanyń mártebesine ıe, komersıalyq emes mekeme bolyp sanalady. 1994 jyly «Bóbek» qaıyrymdylyq qorynyń bastamasymen ashylǵan «Úmit úıi» komýnaldyq memlekettik mekemesi - respýblıkadaǵy erekshe, jańa úlgidegi balamasy joq mekeme. Bul mekemege týǵannan 7 jasqa deıingi densaýlyǵynda kináraty joq, ata-anasynan áleýmettik jaǵdaıynyń nasharlyǵyna baılanysty ýaqytsha ajyratylǵan balalar qabyldanady. Atap aıtqanda, jalǵyzbasty stýdent analar men jalǵyzbasty ákeler nemese asyraýshysynyń bireýinen aıyrylǵan balalar kelip túsedi de, óz múmkindigi asyraý haline jetken kezde alyp ketedi. Qazirgi ýaqytqa deıin 604 bala tárbıelenip, otbasyna oralyp otyr.