Almaty ákimi jasyl jelekterdi sýarý máselesine qatysty pikir bildirdi, dep habarlaıdy Almaty-akshamy.kz.
Aýdan turǵyny:
- Jasyl jelekter týraly suraǵym bar. Tamshylatyp sýarý jumystary Abaı, Saıyn, Altynsarın dańǵyldary boıynda júrgizildi, biraq, soǵan qaramastan, ol jerdegi aǵashtar qýrap jatyr. Qaladaǵy barlyq jasyl jelekterdi tolyq túgendep, sanıtarlyq kesý jumystaryn júrgizý qajet, sonymen qatar tamshylatyp sýarý ádisin ornatý tehnologıasyn qaıta qaraýdy suraımyn.
Almaty qalasynyń ákimi Erbolat Dosaev:
- Men sizdi qoldaımyn. Ókinishke qaraı, aýrý aǵashtardy kesýge úzildi-kesildi qarsy áriptesterińiz bar. Jyl sońyna deıin jasyl jelekterdi kútý erejelerin qabyldaımyz. Bul qujatta tamshylatyp sýarý ádisin salý erejeleri men naqty krıterııleri de jazylady. Qalanyń jasyl qoryn kezeń-kezeńimen jańartý maqsatynda aǵashtardyń jaǵdaıyn zertteýge barlyq botanıka ınstıtýttaryn tartamyz.