Mobıldi qosymsha bos jumys oryndaryn izdeýge jáne jumysqa ornalasýǵa kómektesedi.
Enbek.kz portalynyń mobıldi qosymshasy Elektrondyq eńbek bırjasyndaǵy jumyspen qamtý salasy boıynsha smartfonnyń kómegimen qyzmetterdi alýǵa múmkindik beredi, dep habarlaıdy Almaty-akshamy.kz.
«Enbek.kz» mobıldi qosymshasy saıtpen tolyqtaı sınhrondalǵan, bos jumys oryndaryn izdeýge jáne jumysqa ornalasýǵa kómektesip qana qoımaı, sonymen qatar jumyssyz retinde tirkelip, jumysynan aıyrylýyna baılanysty áleýmettik tólem alýǵa múmkindik beredi. Máselen, mobıldi qosymsha arqyly 6,2 myń adam jumys izdeýshi retinde tirkelse, al 5,7 myń adam jumyssyz retinde tirkelip, onyń ishinde 200-den asa jumysynan aıyrylýyna baılanysty áleýmettik tólem alýǵa ótinish bildirip, áleýmettik járdemaqy aldy, – delingen Eńbek jáne halyqty áleýmettik qorǵaý mınıstrliginiń aqparatynda.
Sondaı-aq, qosymshanyń kómegimen memleket tarapynan sýbsıdıalanatyn ýaqytsha jumys oryndaryna ornalasýǵa bolady, olar: áleýmettik jumys oryndary, qoǵamdyq jumystar, sonymen qatar «Jastar praktıkasy», «Alǵashqy jumys orny», «Urpaqtar kelisimsharty» jáne «Kúmis jas» jobalary boıynsha bos jumys oryndarymen qamtamasyz etiledi.
«Enbek.kz» mobıldi qosymshasyn qoldanýshylar qyzyqtyrǵan bos jumys oryndaryna jaýap berip, jumys berýshilerden shaqyrtý ala alady. Push-habarlandyrý fýnksıasynyń kómegimen túıindemeni qaraǵan jáne oǵan jaýap bergen aqparatty, suhbatqa shaqyrý jáne jumys berýshiniń suqbat nátıjesi boıynsha sheshimin jiberip almaýǵa múmkindik beredi.
Qoldanýshylar qosymshany PlayMarket jáne AppStore dúkenderinen júkteı alady.