Memleket basshysy jarıalaǵan Jumysshy mamandyqtar jylynda qarapaıym eńbek adamdaryn baǵalaý men dáripteý – el damýynyń mańyzdy baǵytyna aınaldy. Óıtkeni kásibine adal, isine tıanaqty mamandar – naǵyz el tiregi. Solardyń biri – búldozer mashınısi Bolat Joltaıuly Kenjemuhanov.
Ol óndiris salasynda 34 jyldan astam eńbek etip keledi. Kóp jylǵy tájirıbesi men kásibı sheberligi arqasynda Bolat Joltaıuly búgingi tańda ujymyna da, qoǵamǵa da úlgi bolyp otyr. Óziniń eńbek jolyn «Qostanaı mıneraldary» aksıonerlik qoǵamynda bastap, jıyrma jylǵa jýyq sol kásiporynda ter tókti, al sońǵy jyldary «Komarov taý-ken kásiporny» JSHS-de qyzmetin jalǵastyrýda.
Bolat Joltaıuly – tek myqty maman ǵana emes, sondaı-aq jastardyń naǵyz tálimgeri. Jańa kelgen jumysshylarǵa baǵyt-baǵdar berip, óz bilimin aıamaı bólisetin tájirıbeli maman. Ol búldozer tehnıkasynyń qyr-syryn jetik meńgerip, qaýipsizdik talaptaryn árdaıym birinshi orynǵa qoıady.
Áriptesteri ony qarapaıymdylyǵy men adaldyǵy úshin, al basshylyq joǵary kásibıligi úshin qurmetteıdi. Jumystaǵy uqyptylyq, tártipke degen jaýapkershilik – onyń basty qaǵıdalary.
Bolat Joltaıulynyń kóp jylǵy qajyrly eńbegi laıyqty baǵalandy. Ol 2022 jyly «Kenshi dańqy» III dárejeli tósbelgisimen marapattaldy. Bul – tek bir adamnyń emes, tutas bir urpaqtyń eńbegine berilgen baǵa. Bul marapat ken óndirý salasynda kóp jyl boıy abyroıly qyzmet etip júrgen, el ıgiligi jolynda aıanbaı eńbek etken azamattarǵa beriledi. B.Joltaıuly bul qurmetke isimen de, ómirlik ustanymymen de ábden laıyq.
Bolat úshin basty qundylyq – otbasy. Jubaıymen birge eki bala tárbıelep, olarǵa eńbekke degen súıispenshilikti, adamdarǵa degen qurmetti jáne týǵan elge adal bolýdy úıretti. Bul – kóp jyldyq eńbek jolymen qatar júretin adamdyq ónege.
Búginde urpaǵyna ónege bola bilgen eńbek adamy – qoǵam úshin de, urpaq úshin de baǵa jetpes tulǵa.