Kez kelgen memlekettiń berik irgetasy – turaqtylyq, tártip jáne zań. Tártip saqshylary osy mańyzdy úshtaǵandy qamtamasyz etýde aıryqsha ról atqarady. Qazaqstan Respýblıkasynyń Prezıdenti Qasym-Jomart Toqaev: «Polısıada joǵary daıyndyqpen kelgen jáne óz isine shynaıy berilgen mamandar jumys isteýi qajet. Tártip saqshylary azamattarǵa úlgi bolýǵa tıis» dep atap ótken bolatyn.
Osy mindetti abyroımen atqaryp júrgenderdiń biri – Aıdos Serik, Almaty qalasy Polısıa departamenti Patrúldik polısıa polkiniń vzvod komandıri. Ol óziniń adal eńbegimen, joǵary kásibı sheberligimen jáne jaýapkershiligimen tanylyp, Almaty qalasy Qoǵamdyq damý basqarmasynyń qoldaýymen uıymdastyrylǵan «Eńbek adamy» jobasynyń qatysýshysy atandy.
Aıdos Serik 1996 jyly 9 aqpanda Qaraǵandy oblysy, Aqtoǵaı aýdany, Saryshaǵan aýylynda dúnıege kelgen. Ata-anasy temirjol salasynda eńbek etip, eńbekqorlyq pen jaýapkershilik qasıetterin boıyna sińirgen. Bala kezinen quqyq salasyna qyzyǵýshylyq tanytqan Aıdos Almaty ýnıversıtetinde «quqyqtaný» mamandyǵy boıynsha bilim alyp, eńbek jolyn Qazaqstan Qarýly kúshterinde bastady.
2015 jyly ol áskerı qyzmetin aıaqtap, Almaty qalasy İshki ister departamentiniń Jol-patrýldik polısıa polkine taǵylymdamashy bolyp qabyldandy. Bir jyldan keıin ol resmı túrde polısıa qyzmetkeri bolyp, quqyq qorǵaý salasyndaǵy kásibı mansabyn bastady.
Aıdos Serik óz qyzmetinde zań buzýshylyqtardyń aldyn alýmen ǵana emes, azamattardyń quqyǵyn qorǵaýda da erekshe kózge túsip keledi. Joǵary kásibıligi men eńbekqorlyǵynyń arqasynda ol birneshe laýazymǵa kóterildi:
- Almaty qalasy Polısıa departamenti Patrúldik polısıa polkiniń qyzmet ınspektory;
- Aǵa ınspektor;
- 2024 jyldan bastap vzvod komandıri.
Qazirgi ýaqytta Aıdos qaramaǵyndaǵy 20 qyzmetkerimen birge Almaty qalasynyń qaýipsizdigin qamtamasyz etý úshin táýlik boıy jumys isteıdi.
«Elimizdiń múddesin qorǵaý – meniń basty mindetim. Biz aýa raıyna nemese ýaqytqa qaramastan, qoǵamdyq tártipti saqtaýdy qamtamasyz etemiz. Polısıa qyzmetkerleri tártip saqshylary dep beker atalmaıdy. Bizdiń jumysymyz – quqyq buzylǵan jerde azamattardy qorǵaý jáne qylmystyń aldyn alý,» – deıdi Aıdos Serik.
Almaty qalasynyń polısıasy jyl saıyn 200 myńnan astam qońyraý men habarlamany óńdeıdi. Qalanyń qylmystyq isteriniń 60%-yn «izin sýytpaı» ashýda Patrúldik polısıa polkiniń róli erekshe. Aıdos Serik osy baǵyttaǵy jumysta óziniń joǵary kásibıligin kórsetip, 9 jyl ishinde 3 myńnan astam qylmystyq jáne ákimshilik quqyq buzýshylyqtyń jolyn kesti.
«Kúndelikti jumys barysynda turǵyndardyń alǵysyn alý – bizdiń basty motıvasıamyz. Árbir shyn júrekten aıtylǵan alǵys bizdiń kúshimizdi arttyryp, senimimizdi nyǵaıta túsedi. Árıne, jumysymyz ońaı emes, biraq men óz isimdi súıemin. Bul – men úshin tek mamandyq emes, el ıgiligi úshin atqarylǵan qyzmet,» – deıdi Aıdos.
Aıdos Serik tek qyzmetimen ǵana emes, jeke qasıetterimen de óz ortasyna úlgi bolýda. Onyń adal eńbegi men patrıottyq qyzmeti jastardy tártip pen zańǵa qurmetpen qaraýǵa shabyttandyrady.
Memleketimizdiń tynyshtyǵyn qamtamasyz etýdegi eren eńbegi úshin Aıdos Serikke alǵys bildiremiz. Mundaı eńbek adamdarynyń arqasynda qoǵamymyz qaýipsiz jáne turaqty bola túsýde.