Memleket basshysynyń tapsyrmasyn oryndaý úshin QR Eńbek jáne halyqty áleýmettik qorǵaý mınıstrligi Dúnıejúzilik Banktiń sarapshylarymen birlesip Eń tómen jalaqyny aıqyndaý ádistemesiniń jobasyn ázirledi.
Ádistemege sáıkes ETJ mólsheri medıanalyq jalaqy men eńbek ónimdiligine qaraı aıqyndalatyn bolady. ETJ aıqyndaý ádistemesiniń jobasy jarıa talqylaý úshin «Ashyq NQA» portalynda ornalastyrylǵan, dep habarlaıdy Almaty-akshamy.kz.
Eńbekmıni Dúnıejúzilik Banktiń sarapshylarymen birlesip halyqaralyq tájirıbege taldaý júrgizdi, ol eń tómen jalaqyny (budan ári – ETJ) belgileý boıynsha neǵurlym keń taralǵan úsh tásildiń bar ekenin kórsetti: biryńǵaı ulttyq ETJ; óńirler, salalar jáne kásiporyndar boıynsha ETJ saralanǵan mólsheri; qyzmetkerlerdiń ártúrli sanattary úshin ETJ.
Búgingi kúni Halyqaralyq eńbek uıymyna (budan ári – HEU) múshe elderdiń 90 %-da ETJ belgilenedi. Onyń 84 %-da ETJ deńgeıi zańmen belgilenedi, qalǵan 6 %-da – jumys berýshiler, qyzmetkerler, kásipodaqtar jáne basqa da múddeli taraptar arasynda ujymdyq shart jasasý jolymen belgilenedi.
Óz kezeginde. HEU barlyq elderge Zańmen belgilengen ETJ-nyń medıanalyq jalaqyǵa qatynasy bolyp tabylatyn Keıs ındeksin keminde 50 paıyz deńgeıinde ustaýdy usynady.
HEU derekterine sáıkes álemniń damyǵan elderindegi Keıs ındeksi shamamen 55 %-dy quraıdy. Qazaqstanda ol aıtarlyqtaı tómen – 2023 jyly 34% boldy.
HEU-nyń halyqaralyq tájirıbesi men usynymdaryn eskere otyryp, ETJ mólsherin medıanalyq jalaqy men eńbek ónimdiliginiń kórsetkishterin paıdalana otyryp anyqtaý usynylady.
Barlyq jaldamaly qyzmetkerlerdiń 50% jalaqy mólsherin jáne túzetý kórsetkishi retinde áreket etetin eńbek ónimdiligin kórsetetin medıanalyq tabysty krıterııler retinde paıdalaný ETJ mólsheriniń teńgerimdiligin qamtamasyz etedi. Osyndaı tásil qyzmetkerlerdiń kiristeri men óndiriletin taýarlar, jumystar men qyzmetter kólemi arasynda naqty baılanys ornatýǵa múmkindik beredi.