Eńbek naryǵyn jan-jaqty damytý úshin Úkimet qysqa merzimde 2030 jylǵa deıingi keshendi jospardy bekitýi kerek. Bul týraly búgin Qazaqstan halqyna Joldaýyn jarıalaý kezinde Memleket basshysy Qasym-Jomart Toqaev aıtty
«Biz buǵan deıin ýáde bergenimizdeı, Úkimet eń tómengi jalaqy mólsherin birtindep ósire beredi. Azamattardyń tabysyn arttyrý úshin 2024 jyldyń 1 qańtarynan bastap eń tómengi jalaqy mólsherin 85 myń teńgege kóterýdi tapsyramyn. Osylaısha, biz eńbekaqynyń eń tómengi mólsherin úsh jyl ishinde eki ese kóbeıttik», - dedi Qasym-Jomart Toqaev.
Prezıdent bul shara 1 mıllıon 800 myń adamnyń, onyń ishinde búdjet salasynda eńbek etetin 350 myń azamattyń ál-aýqatyn arttyrýǵa septigin tıgizetinin aıtty.
«Jalpy, eńbek naryǵyn jan-jaqty damytý úshin Úkimet qysqa merzimde 2030 jylǵa deıingi keshendi jospardy bekitýi kerek. Jańa ekonomıkalyq saıasattyń qaǵıdalary men basymdyqtaryn naqty aıqyndaýmen qatar, aldaǵy reformalardy sapaly ári tolyq júzege asyrý óte mańyzdy. Onyń tabysty bolýy memlekettik qyzmetshilerdiń biliktiligine, jaýapkershiligine jáne saıası erik-jigerine tikeleı baılanysty», - dedi Memleket basshysy.