"Berbang" Qazaqstan kúrdteri asosıasıasy Basqarma keńesiniń tóraǵasy, Qazaqstan halqy Assambleıasy respýblıkalyq qorynyń tóraǵasy, Qazaqstan halqy Assambleıasynyń múshesi, kásipker-mesenat MIRZOEV Rafık Iakýbovıch otandastaryn Analar kúnimen quttyqtaıdy.
– Búgin elimizde Analar kúni. Adamzat ómirindegi eń aıaýly janǵa osyndaı dataly kúnniń arnalǵanyn óte quptaımyn. Áıel-ana – jaryq dúnıeniń, barlyq qýanysh, jaqsylyqtyń bastaýy. Ol, tipti, qanshama shaqyrymdar alysta tursa da, alysta júrgen balasynyń aýyryp qalǵanyn sezetin jan. Sebebi, ana júregi jahandaǵy eń sezimtal, eń meıirimdi júrek der edim.
Ókinishke qaraı, men anamnan tym erte, toǵyz jasymda aıyrylǵanmyn. Sheshem kóz jumǵanda nebári jıyrma jeti jasta bolypty. Jaılaýda, taý eteginen qyzǵaldaqtar terip ákelip syılaǵanym emis-emis esimde qalypty. Keıin musylmandyq dástúrmen týǵan sińlisin meniń ákeme qosqan. Shynymdy aıtsam, týǵan anamnyń joqtyǵyn esh sezbeı óstim. Ekinshi anam da barlyq meıirim, shapaǵatyn aıaǵan joq, jaǵamyzdy kirletpedi, kóńilimizge kóleńke túsirmeı ósirdi, jetkizdi. İni, qaryndas syılady.
Men qazir osynaý ómirimdi anasyz esh elestete almas edim. Bizdiń áýlettegi qalyptastan otbasylyq dástúr – kim qaıda júrmeıik, anamyzdyń týǵan kúninde mindetti túrde qanat baılap ushyp kelip, bárimiz jınala qalamyz. Bizdiń aýyzbirshiligimizdi kórý – ol kisi úshin úlken mereı. Ol kisi de keıin ákemnen jas qaldy. Jastyǵyn, uıqysyz túnderin, jyly-jumsaǵyn tek bizge arnady. Áli kúnge solaı. Sondaı anany qurmetteı almaý – balaǵa syn!
Bizdiń barlyq toıymyzdyń tórinde anam otyrady. Anam barda tórt qubylam teń ekenin sezinýdiń ózi bir ǵanıbet qoı. Nemereleri jan-jaǵynda shurqyrap, máre-sáre bolyp jatqanda, keıde tolqyp ketetinimdi jasyrmaımyn.
Anasyn qadirleı alǵan adamnyń aldynan barlyq esik ashylady dep bilemin óz basym. Ákem men anam úılengen jyly, 8 naýryzda biraz ýaqyt jınap júrgen aqshama dúkennen átir satyp alyp, anama syılaǵanym bar. 3-synypta oqıtynmyn. Bala da bolsam solaı qýantqym kelgen bolar, bizge degen meıirimine kishkentaı syılyǵym arqyly alǵys aıtqym kelgen shyǵar bálkim. Áli kúnge syılyǵymdy úzgen emespin. Qyzmetime baılanysty issaparlarǵa jıi shyǵyp ketemin. Sonda birinshi kezekte anama syılyq satyp alamyn. Biz qazir bólek turamyz. Syılyǵymyzdy alyp, úlken shańyraqqa kirip shyǵý, amandasý, jaǵdaıyn suraý – onyń ózi ananyń ómirin uzartady, janyna tynyshtyq beredi.
Ras, eseıip kele jatqandyǵymyzdyń belgisi me, keıde týǵan sheshemmen oısha syrlasatyn sátterim bolady. Kóz aldymda qalyp qoıǵan aıaýly beınesi júregimdi qozǵap ta jiberedi keıde.
Men barlyq anany qýantqym kelip turady. Biz kómekke muqtaj kópbalaly analarǵa, jalǵyzilikti jandarǵa únemi kómek qolyn sozyp júremiz. Analar muńaımasyn, aýyrmasyn degim keledi.