Qazaqstan balýandarynyń qorjynynda 8 medal bar
11 sáýirde kúresten Azıa chempıonatynda áıelder arasynda jekpe-jek bastaldy. Qazaqstan bes salmaq dárejesinde óner kórsetip, arasynda tek Elmıra Syzdyqova ǵana jarystyń «altyny» úshin judyryqtasýǵa múmkindik aldy, dep habarlaıdy Almaty-akshamy.kz Zakon.kz-ke silteme jasap.
76 keli salmaqta fınalǵa shyǵýy úshin Qazaqstan áıelder quramasy kóshbasshylarynyń biri Elmıra Syzdyqova qytaılyq Jýan Vandy 6:4 esebimen jeńdi. Endi Azıa-2023 chempıony ataǵy úshin sheshýshi beldesýde ol Qyrǵyzstan ókili Aıperı Medetqyzymen kúresedi. Fınal 11 sáýir kúni Astana ýaqytymen 18:00-den keıin ótedi.
Sonymen qatar Qazaqstannyń kúres jankúıerleri Azıa chempıonatynyń qola júldesin sarapqa salatyn taǵy eki sportshymyzǵa qoldaý kórsete alady. Aldymen kilemge Marına Sedneva (55 keli) kóterilse, onyń 3-oryn úshin beldesýdegi qarsylasy Ngýen Tı Maı Trang (Vetnam) bolady. 59 keli salmaqtaǵy Dıana Kaıýmova qola júlde úshin qyrǵyzstandyq Qalmıra Bilimbekqyzymen kúsh synasady.
Azıa chempıonatynyń ekinshi kúninen keıin Qazaqstan balýandarynyń qorjynynda 8 medal bar. Olardy grek-rım kúresiniń balýandary jeńip aldy. Ibragım Magomadov altyn, Dıas Qalen men Nursultan Tursynov kúmis, Almat Kebisbaev, Oljas Syrlybaı, Amanǵalı Bekbolatov, Muhamedáli Mamyrbek jáne Álimhan Syzdyqov qola júldeger atandy.