2000-ǵa jýyq maman daıyndaldy
Osy ýaqytqa deıin kishi býyn mamandaryn daıarlaıtyn mamandandyrylǵan oqý-jattyǵý ortalyǵynan 2000-ǵa jýyq maman bilim alyp shyqty, dep habarlaıdy Almaty-akshamy.kz.
Saltanatty shara Almaty garnızonynyń 03825 áskerı bóliminde ótti. Jyl saıyn baılanys oqý-jattyǵý ortalyǵynda shamamen 200-ge jýyq adam oqyp shyǵady. Olarǵa áskerge qajetti «3-synypty maman», al azamattyq sala boıynsha – «2-razrádty elektr monter mamany» synyptyq biliktiligi beriledi. Ortalyqtyń túlekteri qazirdiń ózinde bólimshelerge bólinip, tıisti mamandyqtar boıynsha mindetterin oryndaýǵa kiristi.
Áskerı bólimniń komandıri, podpolkovnık Asqat Ulybaev oqý prosesiniń aıaqtalýymen jáne jaýyngerlerdiń baılanys kishi mamany biliktiligin alýymen quttyqtap, bylaı dedi:
– Jumyla alǵa qoıǵan jańa maqsattaryńa jetip, elimizdiń ósip-órkendeýine, qorǵanysymyzdyń myǵym bolýyna úles qosyp, aman-esen jaýyngerlik dástúrge saı qundylyqtardy saqtap, Egemen Qazaqstannyń ıgiligi jolynda qanattaryń talmaı, samǵaı berińder!
2013 jyly QR Qorǵanys mınıstrliginiń basshylyǵy kishi býyn mamandaryn daıarlaıtyn mamandandyrylǵan oqý ortalyǵyn qurý týraly sheshimdi qabyldaǵanyn aıta ketelik. Sodan beri bul jerde 2000-ǵa jýyq maman daıyndaldy. Mundaı ortalyqta negizinen merzimdi qyzmettegi sarbazdar oqıdy.
– Áskerdegi boryshyńdy ótegen soń jumysqa ornalasý múmkindigi keńeıtetinine qýanyshtymyn. Jańa Qazaqstanda baılanys oqý ortalyǵyn bitirgen mamandar qajet dep oılaımyn, – deıdi qatardaǵy jaýynger Bekzat Qaldybek.
Oqýdy aıaqtaǵan sarbazdardyń qolyna eki túrli sertıfıkat beriledi, olar armıadaǵy qyzmetin aıaqtaǵannan keıin bul mamandyqpen azamattyq salada jumys taba alady nemese kelisimshart boıynsha qyzmetke qalýyna tikeleı múmkindik beretin qujat bolyp tabylady.
Buryn da aıtyp ótkenimizdeı, merzimdi áskerı qyzmetti ótkerý barysynda jas qazaqstandyqtar ekonomıkanyń naqty sektorynda suranysqa ıe aýyr júk mashınalarynyń, ekskavatorlardyń júrgizýshileri, traktorshylar, jol salatyndar, dızelıst-elektrıkter jáne basqa da mamandyqtardy alyp shyǵady.