Aýǵanstandaǵy oqıǵalar Ońtústik Azıanyń geosaıası mańyzdylyǵyna jańasha kózqaraspen qaraýdy talap etedi.
Qazaqstannyń Syrtqy ister mınıstri Muhtar Tileýberdi «Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty konferensıa barysynda Qazaqstan syrtqy saıasatynyń negizgi baǵyttaryn atady, dep habarlaıdy Almaty-akshamy.kz.
«Sońǵy jyldary túrki elderiniń kooperasıa úderisi aıtarlyqtaı damyp keledi. Túrki keńesi Túrki memleketteriniń tolyqqandy uıymyna aınaldyrylyp, «Túrki kózqarasy–2040» baǵdarlamasy qabyldandy. Túrkistannyń 2021 jyly túrki áleminiń rýhanı astanasy bolyp jarıalanýyn – Qazaqstannyń túrki álemindegi rólin moıyndaý dep baǵalaýǵa bolady. Búginde Qazaqstan Amerıka Qurama Shtattarymen qarym-qatynasynyń jańa kezeńin qalyptastyryp keledi. Keńeıtilgen strategıalyq áriptestik jónindegi komısıa aıasyndaǵy turaqty joǵary deńgeıdegi kezdesýler saıasat jáne qaýipsizdik, saýda jáne ınvestısıa máseleleri boıynsha ózara tıimdi yntymaqtastyqtyń negizi bolyp sanalady. Eýropalyq baǵytta Qazaqstan men EO arasyndaǵy ózara is-qımyl qoldanystaǵy Keńeıtilgen áriptestik pen yntymaqtastyq týraly kelisimde jasalǵan artyqshylyqtardy barynsha paıdalanýǵa, saýda jáne ınvestısıalyq yntymaqtastyqty nyǵaıtýǵa negizdelgen», - dedi mınıstr óz sózinde.
Onyń aıtýynsha, Ulybrıtanıanyń EO-dan shyǵýyna baılanysty mınıstrliktiń aldynda Qazaqstan-Brıtan qarym-qatynasyn reformalaý mindeti tur.
«Qazaqstan men Ulybrıtanıa arasyndaǵy jańa Strategıalyq áriptestik týraly kelisim boıynsha jumys oıdaǵydaı aıaqtaldy. Shyǵys Azıa elderimen qarym-qatynasymyz búginde júıeli damyp keledi. Keńeıtilgen strategıalyq áriptestik rýhynda Japonıamen saıası dıalog jalǵasady. Ońtústik Koreıamen ózara is-qımyl Prezıdent Qasym-Jomart Kemeluly Toqaevtyń ótken jyldyń tamyz aıynda Seýlge saparynan keıin jańa serpin aldy. Ońtústik-SHyǵys Azıa elderimen yntymaqtastyqtyń ósip kele jatqan áleýetin paıdalanýǵa múddelimiz», - dedi Muhtar Tileýberdi.
Mınıstr atap ótkendeı, Aýǵanstandaǵy oqıǵalar Ońtústik Azıanyń geosaıası mańyzdylyǵyna jańasha kózqaraspen qaraýdy talap etedi. Demek, Pákistan men Úndistan jańa kóliktik-logıstıkalyq baǵyttardy damytý nátıjesinde Ortalyq Azıa elderine ózderiniń teńiz porttaryna shyǵýdy qamtamasyz ete alady.
«Saıası landshafttyń aıtarlyqtaı qubylýyna ákelýi múmkin aýqymdy ózgeristerge baılanysty nazarymyz Úlken Taıaý Shyǵys aımaǵynda da bolady», - dep qosty ol.