Ózgeristerde jańa tirkelgen bıznes kásiporyndary úshin óz ónimderin ótkizý kezinde qosylǵan qun salyqty 70%-ǵa tómendetý sıaqty salyq jeńildikteri kózdelgen. Bul jeńildikti zańdy tulǵa tirkelgen sátten bastap eki jyl boıy qoldanýyna bolady.
Zańda pandemıadan týyndaǵan shekteý sharalary kezeńinde bıznesti qoldaý sharalaryn kórsetýge, salyq mindettemeleriniń oryndalýyn jeńildetýge jáne iskerlik belsendilikti yntalandyrýǵa baǵyttalǵan ózgerister bar, dep habarlaıdy Almaty-akshamy.kz QR Ulttyq ekonomıka mınıstrliginiń baspasóz qyzmetine silteme jasap.
Mınıstrliktiń málimetinshe, Qazaqstan Respýblıkasynyń «Salyq jáne búdjetke tólenetin basqa da mindetti tólemder týraly» kodeksine (Salyq kodeksi) jáne Qazaqstan Respýblıkasynyń «Qazaqstan Respýblıkasynyń Salyq jáne búdjetke tólenetin basqa da mindetti tólemder týraly» kodeksin (Salyq kodeksi) qoldanysqa engizý týraly» zańyna ózgerister men tolyqtyrýlar engizý týraly» Zańyna qol qoıdy.
Óndeý ónerkásibindegi shaǵyn bıznes sýbektileri úshin olar jańa negizgi qorlarǵa qaıta ınvestısıalanǵan jaǵdaıda alynǵan tabystan korporatıvtik tabys salyǵynan bosatý kózdelgen. Bul ınvestısıalyq ahýaldy jaqsartýǵa jáne óńdeý ónerkásibin damytýǵa múmkindik beredi.
Sondaı-aq, zańda pandemıaǵa baılanysty tekserý men emdeýdi qosa alǵanda, sanıtarıalyq-epıdemıologıalyq, sanıtarıalyq-profılaktıkalyq is-sharalardy uıymdastyrýǵa jáne júrgizýge jumys berýshiniń shyǵystary boıynsha qyzmetkerdiń tabysy tabys salyǵyn salýdan bosatylatyn normalar bar.
Jańa engizilimderdiń biri mobıldik qosymshany paıdalaný arqyly arnaıy salyq rejımin engizý bolyp tabylady, ol salyq tóleýshiniń qyzmetin tirkeýdi, toqtatýyn jáne salyq mindettemelerin oryndaýyn jeńildetýge múmkindik beredi.
2021 jylǵy 1 qańtardan bastap pandemıadan zardap shekken 114 qyzmet túri úshin bólshek salyqtyń arnaıy salyq rejımi 2 jyl merzimge engizildi. 2023 jyldan 2025 jylǵa deıin qoǵamdyq tamaqtaný salasy úshin rejım uzartylady. Salyq stavkasy 6% mólsherinde belgilengen.
Rejımniń basty ereksheligi - rejımdi tóleýshiler qosylǵan qun salyq pen áleýmettik salyqty tólemeıdi.
Sondaı-aq, zańmen salyqtyq ákimshilendirý bóliginde salyq tóleýshilerdiń qyzmetine oń áser etetin normalar qabyldandy. Máselen, 6 aılyq eseptik kórsetkish nemese 17 502 teńge salyq beresheginiń shekti mólsheri belgilengen, odan tómen bolsa shottarǵa tyıym salynbaıdy. İs júzinde, tipti shamaly soma shottardyń jabylýyna jáne, tıisinshe, bıznes sýbektileriniń toqtatylýyna ákelýi múmkin.
Bankterge salyq tóleýshi qaryzdy tólegennen keıin birden shot ashý quqyǵy berildi. Salyq bereshegin ótegen jaǵdaıda shottardy jyldam ashý bıznes sýbektileriniń ýaqytyn únemdeýge múmkindik beredi.
Memleket basshysynyń Úkimettiń 1 sáýirdegi keńeıtilgen otyrysynda bergen tapsyrmalaryn oryndaý úshin 2021 jylǵy 1 sáýirden bastap 1 shildege deıin zardap shekken salalarda eńbekaqy tóleý qorynan jeke tabys salyq jáne áleýmettik salyq tóleýdi keıinge qaldyrý engizildi. Bul ereje bólshek salyq rejımi úshin anyqtalǵan 114 qyzmet túrine qoldanylýy múmkin.
Pandemıaǵa baılanysty shekteý sharalaryna baılanysty 2019 jáne 2020 jyldarǵa rezıdenttik sertıfıkatyn usyný merzimi 2021 jylǵy 31 jeltoqsanǵa deıin uzartyldy. Bul shekteý sharalary kezeńinde qosarlanǵan salyq salýdy boldyrmaýǵa baǵyttalǵan, óıtkeni shet elderde karantındik sharalardy engizý sebebinen qujattardy usyný qıyn.
Osylaısha, qabyldanǵan sharalar ýaqtyly bolyp tabylady, bıznes sýbektileriniń aınalym qarajatyn ulǵaıtýǵa jáne olardy basqa óndiristik shyǵystarǵa baǵyttaýǵa, salyq mindettemelerin oryndaýdy jeńildetýge múmkindik beredi.