«Mýzeıler túni» halyqaralyq aksıasy aıasynda 2024 jyldyń 18 mamyrynda saǵat 18:00-den 00:00-ge deıin Almaty qalasyndaǵy mýzeılerde tarıh jáne ónersúıer qaýym úshin birqatar qyzyqty shara uıymdastyrylady.
Mýzeılerge kelýshiler eksklúzıvti artefaktiler men sırek kezdesetin esponattardy, tarıhı keıipkerlerdiń qatysýymen teatrlandyrylǵan qoıylymdar tamashalaı alady. Sondaı-aq kvestter men vıktorınalarǵa, qysh ydystar jasaý jáne ortaǵasyrlyq monetalardy soǵý, mýzykalyq aspaptar men zergerlik buıymdar jasaý boıynsha sheberlik synyptarǵa qatysa alady. Belgili mýzeıtanýshylar men ǵalymdar Almaty turǵyndary men qonaqtaryna avtorlyq ekskýrsıalar ótkizip, ınteraktıvti dárister júrgizedi, dep habarlaıdy Almaty-akshamy.kz.
Bul túni Almaty mýzeıleriniń barlyǵyna kirý tegin bolady. «Mýzeıler túni» aksıasy aıasynda kelýshiler mádenıet pen tarıh baǵytyndaǵy bilimin tarazylap, dáýirler men óner arqyly biregeı jáne ınteraktıvti álemge saıahattaı alady.
Aksıa aıasynda qyzyqty sharalar uıymdastyratyn Almaty mýzeıleriniń tizimi:
1. Almaty mýzeıi – Qabanbaı batyr kóshesi, 132
2. Yqylas atyndaǵy halyq mýzykalyq aspaptar mýzeıi – Zenkov kóshesi, 24a
3. D.A.Qonaev mýzeıi - Tólebaev kóshesi, 117
4. N. Tilendıevtiń memorıaldyq mýzeıi – Qonaev kóshesi, 96
5. S. Muqanov atyndaǵy ádebı-memorıaldyq mýzeı - Tólebaev kóshesi 125
6. Ǵ. Músirepov atyndaǵy ádebı-memorıaldyq mýzeı kesheni - Tólebaev kóshesi 130
7. Mýltımedıalyq dástúrli mýzykalyq ortalyq - Nurkent shaǵyn aýdany 1, 5/11
8. A. Baıtursynulynyń mýzeı-úıi - Baıtursynuly kóshesi, 60
Ekskýrsovodtar, aty ańyzǵa aınalǵan tulǵalardyń urpaqtary, mádenıet qaıratkerleri, ataqty artıser men tanymal blogerler mýzeılerge kelgen qala turǵyndary men qonaqtaryna mádenı-tanymdyq baǵdarlamalar usynady. Baǵdarlama Almaty qalasy ákimdiginiń resmı ınternet-resýrsynda jarıalanǵan. Anyqtama telefony: 272-43-21, 87088206179, Aııa Belálova – Almaty qalasy mýzeıler birlestiginiń baspasóz hatshysy.
Anyqtama úshin: «Mýzeıler túni» alǵash ret 1997 jyly Berlınde ótti. Halyqaralyq mýzeıler kúnine oraılastyrylǵan aksıanyń maqsaty – mádenı mura men ónerdi nasıhattaý. Qazaqstanda bul aksıa 2006 jyldan bastap uıymdastyryp keledi.